სამოქალაქო პლატფორმა "არა ფობიას" შეშფოთებას გამოთქვამს არასამთავრობო ორგანიზაცია იდენტობის და მისი წარმომადგენლის, ირაკლი ვაჭარაძის მიმართ სოციალურ ქსელებში გავრცელებულ ფიზიკური განადგურების მუქარის შემცველი გზავნილების თაობაზე, რომელიც ი. ვაჭარაძის მიერ პატრიარქის საშობაო ეპისტოლეს კომენტირებას მოჰყვა. სამოქალაქო პლატფორმა მოუწოდებს სამართალდამცავ ორგანოებს, კანონის სრული სიმკაცრით, დაუყოვნებლივ მოახდინოს რეაგირება ამ განცხადებების ავტორების მიმართ და დაიცვას ორგანიზაცია იდენტობის წევრების უსაფრთხოება. 12 არასამთავრობო ორგანიზაციის შეფასებით, წინააღმდეგ შემთხვევაში, ვაჭარაძის ან იდენტობის თანამშრომლების მიმართ განხორციელებულ ნებისმიერ დანაშაულზე პასუხისმგებლობა დაეკისრება სახელმწიფოს.
"ზემოაღნიშნული განცხადებების კამპანიის ერთ-ერთი ორგანიზატორია თავისუფალი თაობის ლიდერი ლადო სადღობელაშვილი, რომელიც სოციალურ ქსელ ფეისბუქზე წერს: “ვაჭარაძეს მოვუწოდებ, ბოდიში მოიხადოს. წინააღმდეგ შემთხვევაში კარებზე მივუკაკუნებთ”,“ირაკლი ვაჭარაძე - მოიხადე ბოდიში! ითხოვე პატიება! წინააღმდეგ შემთხვევაში ჩათვალეთ, იდენტობა არ არსებობს! შენ და შენს კანტორას ელის ძალიან ცუდი დღეები! შენს ნაცკონტროლირებად-ექსტრემისტულ ორგანიზაციას უნდა მოეღოს ბოლო!!! ჩვენთან არს უფალი!” რასაც მოყვება სხვა პირების აგრესიული კომენტარები, მათ შორის, ი.ვაჭარაძის სიცოცხლის მოსპობის თაობაზე", - აცხადებს არა ფობიას და აღნიშნავს, რომ განსაკუთრებულ შეშფოთებას იწვევს ლადო სადღობელაშვილის მიერ დაანონსებული საპროტესტო აქცია იდენტობის ოფისთან, ორგანიზაციის აკრძალვის მოთხოვნით.
"ვაჭარაძის თქმით, მასთან ტელეფონით დაკავშირებას ცდილობს ასევე გიორგი გაბედავა, რომელიც უგზავნის მუქარის შემცველ და შეურაცხმყოფელ შეტყობინებებს, უთითებს ვაჭარაძის საცხოვრებელ მისამართს, ემუქრება სიცოცხლის მოსპობითა და ოჯახზე თავდასხმით. მიგვაჩნია, რომ ირაკლი ვაჭარაძისა და ორგანიზაცია იდენტობას მიმართ, შესაძლოა, ხორციელდებოდეს მუქარა, დანაშაული, გათვალისწინებული საქართველოს სისხლის სამართლის კოდექსის 151-ე მუხლით. ასეთ შემთხვევაში საქართველოს მთავარი პროკურატურა ვალდებულია, დაუყოვნებლივ დაიწყოს გამოძიება. სახელმწიფო ასევე ვალდებულია, მიიღოს ყველა საჭირო ზომა ირაკლი ვაჭარაძისა და ორგანიზაცია “იდენტობას” თანაშრომლების უსაფრთხოებისა და ხელშეუხებლობის დასაცავად. ამასთან, სახელმწიფომ ყველაფერი უნდა გააკეთოს ქვეყანაში სიტყვის და გამოხატვის თავისუფლების დაცვისთვის, რომელიც დემოკრატიული სახელმწიფოს ერთ-ერთი უმთავრესი მონაპოვარია, რათა ამ უფლების განხორციელება მოქალაქეებს სხვადასხვა დაჯგუფებების მხრიდან დევნის და მით უმეტეს, ჯანმრთელობის და სიცოცხლის ფასად არ დაუჯდეთ", - ნათქვამია განხცადებაში, რომელსაც ხელს აწერს საქართველოს დემოკრატიული ინიციატივა (GDI), საერთაშორისო გამჭვირვალობა - საქართველო (TI), მედიის განვითარების ფონდი (MDF), იდენტობა, სამართლიანი არჩევნებისა და დემოკრატიის საერთაშორისო საზოგადოება (ISFED), ადამიანის უფლებების სწავლებისა და მონიტორინგის ცენტრი (EMC), საქართველოს რეფორმების ასოციაცია (GRASS), საქართველოს ახალგაზრდა იურისტთა ასოციაცია (GYLA), ტოლერანტობის და მრავალფეროვნების ინსტიტუტი (TDI), კონსტიტუციის 42-ე მუხლი, უმცირესობის საკითხთა ევროპული ცენტრი (ECMI) და კავშირი საფარი.
