რუსთავი 2

გოგიჩაიშვილი R2-დან წასვლაზე: მიუღებელი იყო ერთპიროვნული გადაწყვეტილებები

0 კომენტარი
ფოტო: ტაბულა

ტელეკომპანია რუსთავი 2-ის წამყვანმა აკაკი გოგიჩაიშვილმა 20-წლიანი მუშაობის შემდეგ არხი დატოვა და სამუშაოდ იბერიაში გადავიდა. ინფორმაციას ამის შესახებ თავად ჟურნალისტი ადასტურებს და Facebook-ის საკუთარ გვერდზე ვრცელ პოსტს აქვეყნებს იმის შესახებ, თუ რამ განაპირობა მისი გადაწყვეტილება. 

გოგიჩაიშვილის თქმით, რუსთავი 2-ში გადაწყვეტილებები ერთპიროვნულად, პოლიტიკური გემოვნების მიხედვით მიიღება და ეს მისთვის მიუღებელია. 

"კი ვიძახეთ და ლამის შუბლზე დავიწერეთ, რუსთავი 2 ჩემიაო, მაგრამ ვერ გახდა ჩემი. უფრო სწორად, იყო წლების წინ და აღარ არის და არც აქციები შველის საქმეს საპატიოდ რომ გადმომეცა ერთ ცნობილ შეკრებაზე არხის "ღმერთებთან" და "დედოფლებთან" ერთად, დამილოცნია მისთვის, ვინც პირველი დაწერს, რომ მოსწონს ის, რაც ხდება არხზე და ასეთი მენეჯმენტი მისაღებია:

ყველა თემის გაშუქებაზე ერთპიროვნული გადაწყვეტილება, ისევე, როგორც დაბლოკვაზე - ერთპიროვნული პოლიტიკური თუ სხვა სახის გემოვნების მიხედვით. არასდროს რუსთავი 2-ზე ეს არ ყოფილა და ახლა არის. იყო ხანდახან, თუმცა მე პირადად, ყოველთვის შემეძლო შეკამათებაც და სარედაქციო დამოუკიდებლობის შენარჩუნებაც - ესეც დასრულდა. ამიტომ, მე ვტოვებ არხს 20-წლიანი, არ მომერიდება დაწერა, თავდაუზოგავი მუშაობის შემდეგ.

ჩემთვის მიუღებელია, როდესაც მრავალწლიანი გამოცდილების კვალიფიციურ კადრებს ერთი ხელის მოსმით ახსნა-განმარტების გარეშე ქუჩაში უშვებენ ერთპიროვნული გემოვნებით და "ფული არ არის საკმარისი" ამას ნამდვილად ვერ ხსნის, რადგან მათზე მაღალი ხელფასით უამრავი სხვა ადამიანი, მეგობრები, ახლობლები და ა.შ. სრულიად გაუგებარი დანიშნულებით პრობლემა თურმე არ არის. 

მიუღებელია, რომ ათწლეულების საბრენდო გადაცემა ყოველგვარი ახსნა-განმარტების გარეშე ისე იხურება, რომ იქ მომუშავეები ამის შესახებ შემთხვევით, ეთერის წინ იგებენ პროგრამების განყოფილებიდან. და ვერც ამას ხსნის "ფინანსური პრობლემები", რადგან ამ გადაცემას ოთხმაგი და ხუთმაგი ბიუჯეტი ხელფასადაც გაიცემა და თითქოს ესეც პრობლემა არ არის. 

არ მესმის, როდესაც არხის დირექტორი ქათმის ბარკლებს პირადად უკეთებს რეკლამას ეთერში, არ მესმის, როდესაც ხან დირექტორია, ხან პოლიტიკოსი, ხანაც არხის მთავარი მელომანი თუ ქვეყნის მთავარი გურმანი და არ ესმის, რომ ჟურნალისტები, რომლებმაც შექმნეს არხი და დღესაც მხრებით მიაქვთ, ელემენტალურ ახსნას იმსახურებენ, თუ რატომ არ უნდა გავიდეს ეთერში სიუჟეტი, რომელშიც უამრავი შრომა ჩადეს ან რატომ უნდა გადაიცვალონ ერთი გადაცემიდან მეორეში თითების ერთი გაწკაპუნებით. კადრების განყოფილებიდან ერთი სატელეფონო ზარი ამას ნამდვილად არ შველის. 

თუ ვინმეს ჰგონია, რომ დათო კიკალიშვილი ევროპის ხიბლით წავიდა არხიდან, ცდება. თუ ვინმეს ჰგონია, რომ ხელფასისა თუ უხელფასობის გამო მივდივარ, ცდება. თუ ვინმეს ჰგონია, რომ მე ვიქნები უკანასკნელი, ვინც წავა, ასევე ცდება. თუ დირექტორმა არ იცის, რაზე საუბრობენ თანამშრომლები, რა აწუხებთ და რაზე აქვთ პროტესტი, ჩვენ მაინც ხომ ვიცით, და თუ რამე მეშლება, შემისწორეთ, თუ ვინმეს ვაწყენინე, ბოდიში. 

არაფერზე გული არ მწყდება იმ ძალიან კარგი ადამიანების გარდა, ვისაც ყოველდღე ვხედავდი და ახლა, უბრალოდ, ხშირად ვერ ვნახავ და ვერც მათ გვერდით დავიცავ არხის იმიჯს - წარმატებები ყველას,"- წერს აკაკი გოგიჩაიშვილის. 

გოგიჩაიშვილის პოსტს Facebook-ზე რუსთავი 2-ის გენერალური დირექტორი ნიკა გვარამია გამოეხმაურა და დაწერა, რომ სამწუხაროა, როცა ადამიანები ფულის გამო სახეს კარგავენ. 

"რა სამწუხაროა, როცა ადამიანები ფულის გამო სახეს კარგავენ და საკუთარი კომპანიის და სწორი პრინციპების და ღირებულებების წინააღმდეგ იმათ სამსახურში გადადიან, ვისგანაც გამალებული იცავდი. ხო მართლა, დაბლოკვებით შეწუხებული გოგიჩაიშვილი, პატრიოტთა ალიანსის წევრის ტელევიზიაში გადავიდა. 30%იანი პროდასავლური რ2დან, 0,3%იან ოქუაშვილის იბერიაში,"- წერს გვარამია. 

ახალი ვიდეო მეტი ვიდეო

შსს-მ 10 შეკვრა ჰეროინი ამოიღო და ნარკოდანაშაულისთვის 5 პირი დააკავა (ვიდეო)

კომენტარები