აშშ-ის რესპუბლიკელ სენატორზე, ჯონ მაკკეინზე, HBO-მ დოკუმენტური ფილმი გადაიღო, სახელწოდებით "ჯონ მაკკეინი: ვის უხმობს ზარი". ეს სახელი ერნესტ ჰემინგუეის იმავე სახელწოდების რომანიდან მოდის, რადგან სენატორის საყვარელი წიგნია.
ფილმის პრემიერა 28 მაისს, ამერიკულ შეიარაღებულ ძალებში მსახურებისას დაღუპულთა ხსოვნის დღეს გაიმართება.
HBO-ს განმარტებით, ეს ფილმი თანამედროვე ამერიკული პოლიტიკის ყველაზე შთამაგონებელი პიროვნების ექსკლუზიური პროფილია. ფილმი მოიცავს სენატორის ინტერვიუებს, კომენტარებსა და სიტყვით გამოსვლებს, როგორც ბეჭდური მედიის, ასევე ტელევიზიების აქრივებიდან. ამასთან, ამ დრომდე არ გამოქვეყნებულ სამოყვარულო ვიდეოებსა და ფოტოებს. ასევე, ფილმში იქნება ინტერვიუები მაკკეინის ოჯახის წევრებთან, მეგობრებთან, კოლეგებთან და წამყვან პოლიტიკურ ფიგურებთან, რომელთა შორის ექსპრეზიდენტები ბილ კლინტონი და ჯორჯ ბუში არიან.
HBO-ს აღმასრულებელი დირექტორი რიჩარდ პლეპლერი ყვება, თუ რა რეაქცია ჰქონდა სენატორ მაკკეინს, როცა გასულ ზაფხულს მას პირადად უთხრა, რომ კომპანია მისი ცხოვრების შესახებ დოკუმენტური ფილმის გადაღებას აპირებდა:
"მაკკეინს სახე გაუნათდა, შემომხედა და მითხრა, რომ ეს წარმოუდგენელი იქნებოდა და რომ მას სურდა, ამ ექსტრაორდინარულ დღეს ჩვენთან ერთად ყოფილიყო. მე ვუთხარი, რომ ღვთის წყალობით, ის იქნებოდა და, აი, არის კიდეც".
2017 წლის ივლისში ჯონ მაკკეინს თავის ტვინის სიმსივნის მძიმე ფორმა - გლიობლასტომა დაუდგინეს. მას მარცხენა საფეთქელთან მქონე არხიდან უკვე ამოუღეს შედედებული სისხლი და დაზიანებული ქსოვილი.
მაკკეინს ჯერ კიდევ 2000 წელს დაუდგინეს კანის კიბო, რისგანაც სენატორმა განკურნება შეძლო, თუმცა ტვინის სიმსივნის კერა სწორედ იმ ადგილთანაა ახლოს, სადაც მას კანის კიბო ჰქონდა.
ამერიკელი სენატორი იბრძოდა ვიეტნამის ომში, 1987 წლიდან კი აშშ-ის სენატში არიზონას შტატს წარმოადგენს. 2008 წელს რესპუბლიკური პარტიიდან პრეზიდენტობაზე იყარა კენჭი, თუმცა როგორც მოგეხსენებათ, დემოკრატ ბარაკ ობამასთან დამარცხდა.
მაკკეინს სრულიად სამართლიანად მიიჩნევენ საქართველოს დიდ მეგობრად, რადგან ის რუსეთისადმი კრიტიკული დამოკიდებულებით გამოირჩევა და ამასთან, საერთაშორისო საზოგადოებაში მუდმივად ლობირებს საქართველოს. სენატორი თბილისში არაერთხელ ყოფილა სტუმრად. ბოლო ვიზიტი 2017 წლის იანვარში შედგა.
