ნაციონალური მოძრაობის და ძალა ერთობაშიას პრემიერმინისტრობის კანდიდატი, მესამე პრეზიდენტი მიხეილ სააკაშვილი იქნება - ამის შესახებ პარტიის თავმჯდომარემ, გრიგოლ ვაშაძემ ბრიფინგზე თქვა.
"მიხეილ სააკაშვილი უნდა დაბრუნდეს საქართველოში და ის უნდა იყოს პირისპირ თავის ხალხთან. ზუსტად ამიტომ ენმ-მა გაერთიანებულ ოპოზიციაში შემავალმა ყველა პარტიამ მისი კანდიდატურა დავასახელოთ საქართველოს პრემიერმინისტრობაზე". – თქვა ვაშაძემ.
მისივე თქმით, სამომავლო გეგმებზე მიხეილ სააკაშვილი თავად ისაუბრებს.
ინფორმაცია იმის შესახებ, რომ ენმ-ს პრემიერმინისტრობის კანდიდატი მიხეილ სააკაშვილი იქნებოდა, ტაბულამ 7 აგვისტოს წყაროზე დაყრდნობით გაავრცელა.
მიხეილ სააკაშვილი უკრაინის მოქალაქეა - საქართველოს კონსტიტუციის 25-ე მუხლის მიხედვით კი პრემიერმინისტრის თანამდებობას ვერ დაიკავებს პირი, რომელიც სხვა სახელმწიფოს მოქალაქეა.
"საქართველოს პრეზიდენტის, პრემიერ-მინისტრის ან პარლამენტის თავმჯდომარის თანამდებობა არ შეიძლება ეკავოს საქართველოს მოქალაქეს, რომელიც იმავდროულად სხვა სახელმწიფოს მოქალაქეა". – ვკითხულობთ კონსტიტუციაში.
სააკაშვილისთვის საქართველოს მოქალაქეობის მინიჭება პრეზიდენტს, სალომე ზურაბიშვილს შეუძლია. ზურაბიშვილი პრეზიდენტის პოსტს 2023 წლამდე იკავებს. ამასთან, იმისთვის, რომ პრემიერმინისტრის თანამდებობა ეკავოს, ექსპრეზიდენტის წინააღმდეგ სისხლის სამართლის საქმეები უნდა შეწყდეს.
