რუსული საოკუპაციო ძალები ცხინვალის რეგიონში გაძლიერებულ საბრძოლო მზადყოფნაზე გადაიყვანეს. ამის შესახებ რუსული ინტერნეტ-გამოცემა Life News საკუთარ წყაროებზე დაყრდნობით იუწყება. როგორც გამოცემას წყარომ აცნობა, სამხედროები მზად არიან „განგაშის გამოცხადებისთვის“, გუშაგების რაოდენობა სამხედრო ობიექტებზე ორჯერ გაიზარდა.
როგორც Life News-სთან საუბრისას რუსეთის სამხრეთი სამხედრო ოლქის პრესსამსახურის უფროსმა იგორ გორბულმა განუცხადა, რუსი სამხედროები „მუდმივად თვალყურს ადევნებენ ცხინვალში შექმნილ მდგომარეობას“, თუმცა სიტუაციაში არ არევიან, ვინაიდან საპრეზიდენტო არჩევნები „სამხრეთ ოსეთის შიდა საქმეა“.