საქართველოს საგარეო საქმეთა მინისტრის მოადგილე სერგი კაპანაძემ ”ტაბულასთან” საუბრისას უარყო დღეს დილიდან გავრცელებული ცნობა, თითქოს რუსეთ-საქართველოს საზღვარზე ცხინვალისა რეგიონისა და აფაზეთის სავაჭრო დერეფნებში არ განლაგდებიან მონიტორები ( როგორც ამას ვაჭრობის მსოფლიო ორგანიზაციაში გაწევრიანებასთან დაკავშირებით შვეიცარიის შუამავლობით მიღწეული რუსეთ-საქართველოს შეთანხმება ითვალისწინებს) და მონიტორინგი მხოლოდ ელექტრონული სისტემის მეშვეობით განხორციელდება. ინფორმაცია ეყრდნობოდა საგარეო საქმეთა მინისტრის მოადგილის ნინო კალანდაძის ნათქვამს , რომ დერეფნებში მონიტორინგი განხორციელდება ელექტრონული სისტემით. სერგი კაპანაძემ ”ტაბულას” უთხრა, რომ საინფორმაციო საშუალებებმა არა სწორად გაიგეს ნინო კალანდაძის ნათქვამი . მან ხაზი გაუსვა, რომ მონიტორინგი განხორციელდება ზუსტად ისე, როგორც ამას შეთანხმება ითვალისწინებს. საგარეო საქმეთა მინისტრის მოადგილემ აღნიშნა ისიც, რომ საქართველოს მხარემ შვეიცარიისგან მიიღო იმ კომპანიების სია, რომელთაგანაც ერთ-ერთი იქნება შერჩეული რუსეთ-საქართველოს საზღვარზე სავაჭრო ტვირთბრუნვის გასაკონტროლებლად. სერგი კაპანაძის თქმით, კომპანიის შერჩევასთან დაკავშირებით შვეიცარია გადაწყვეტილებას , სავარაუდოდ, დეკემბრის ბოლომდე მიიღებს.
tbl.ge/uyy
დაკოპირდა