2012 წლის საერთო სამაგისტრო გამოცდა დასრულდა. 12 ივლისს მაგისტრანტობის კანდიდატებმა გამოცდა ანალიტიკურ წერასა და წაკითხულის გააზრებაში ჩააბარეს, 13 ივლისს კი - ლოგიკურ და რაოდენობრივ მსჯელობაში.
წელს წაკითხულის გააზრების ნაწილში მაქსიმალური ქულაა 21, მინიმალური კომპეტენციის ზღვარი - 6.4; ანალიტიკურ წერაში მაქსიმალურია 24, მინიმალური - 7.3; ლოგიკურ მსჯელობაში ზღვარია 5.2, ამ ნაწილში მაგისტრანტობის კანდიდატებს შეუძლიათ მაქსიმუმ 17 ქულის დაგროვება; რაოდენობრივ მსჯელობაში მაქსიმალური ქულაა 20, მინიმალური - 5.1.
სამაგისტრო პროგრამებზე სწავლის გასაგრძელებლად საერთო სამაგისტრო გამოცდის ჩაბარება ყველა მაგისტრანტობის კანდიდატისთვის სავალდებულოა. გარდა ამისა, სახელმწიფო დაფინანსება მხოლოდ საერთო სამაგისტრო გამოცდის შედეგით გაიცემა.
2012 წელს სამაგისტრო გამოცდაზე 8 ათასამდე მსურველი დარეგისტრირდა. მაგისტრატურის კანდიდატთა კოეფიციენტებით რანჟირება ამ წლის კონკურსის გათვალისწინებით მოხდება. მომავალი მაგისტრებისათვის მხოლოდ 100%-იანი სახელმწიფო გრანტია გათვალისწინებული, იგი 2250 ლარს შეადგენს.
საერთო სამაგისტრო გამოცდის შედეგს მაგისტრანტობის კანდიდატები აგვისტოს ბოლოს გაიგებენ. საერთო სამაგისტრო გამოცდის წარმატებით ჩაბარების შემთხვევაში ისინი სპეციალობის გამოცდას უშუალოდ უმაღლეს სასწავლებლებში გაივლიან.