დღეს, 7 მაისს, პირველი რადიოს რადიოკლუბში დეპუტატმა კობა დავითაშვილმა განაცხადა, რომ პრემიერი ივანიშვილის საჯარო განცხადებებში, მან "საწყენი რამ" დაინახა.
"პრემიერი გამონათქვამში საწყენი რამე დავინახე. ორი ფრაზა - სერგეენკო აკეთებს უფრო მეტს ვიდრე კობა დავითაშვილი აკეთებს ან ოდესმე გაუკეთებია, ეს იყო ჩემი ცხოვრების გადახაზვა ერთი დიდი წითელი ხაზით და მართალი გითხრათ მსგავსი შეურაცხყოფა არცერთი ოპონენტისგან არ მიმიღია. ჩემს ცხოვრებაში იყო საკამათო ეპიზოდები, ამაზე მუდმივად მიმითითებენ - "ნავერწილე" და ჟირინოვსკიმ, რომ ხელი არ ჩამომართვა, მაგრამ არავის უთქვამს, რომ დავითაშვილს ცხოვრებაში არაფერი გაუკეთებია, და ასევე პრემიერის განცხადება - მე ვენდობი სეერგეენკოს, საქმეში არ ჩამიხედავს, არც დავინტერესებულვარ მაგრამ ვენდობი. სამწუხარო განცხადებებია და გულწრფელად მწყინს ისიც, რომ ბიძინა ივანიშვილისთვის მიხეილ სააკაშვილი უფრო სანდო წყარო ყოფილა ვიდრე დავითაშვილი. მესმის, რომ სეერგეენკო ძვირფასია ბიძინასთავის, მე ის კორუმპირებულობაში არ დამიდანაშაულებია, ამიტომ ბოდიშის მოხდაც არ იყო საჭირო. მაგრამ კვლავ ვთვლი, რომ ის სქემა, რომელიც ნაციონალების დროს შეიქმნა, არის კორუფციული. მე მოველოდი საკითხის აზრის განხილვას და არა პროცედურის. მაგრამ პროცედურაც დაცული მქონდა - ორჯერ მივმართე პრემიერმინისტრს, ფრაქციის სხდომაზე დავსვი საკითხი, შემდეგ მთავრობისა და უმრავლესობის გაერთიანებულ სხდომაზე პირისპირ ვუთხარი მინისტრს. აქედან გამომდინარე, ბიძინა ივანიშვილის შეფასება იყო ძალიან შეურაცხმყოფელი. მაინტერესებს კვლავ ასე ფიქრობს ის თუ არა. შეურაცხყოფა საჯაროდ მოხდა და საჯაროდ მაინტერესებს დღესაც ასე ფიქრობს თუ არა პრემიერი", - განაცხადა კობა დავითაშვილმა.
შეგახსენებთ, რომ 22 აპრილს დეპუტატმა დავითაშვილმა ჯანდაცვის მინისტრი სადაზღვევო კომპანიებთან კორუფციულ გარიგებებში დაადანაშაულა. სერგეენკომ დეპუტატისგან კორუფციულ გარიგებაში მონაწილეობის დამადასტურებელი დოკუმენტების წარმოდგენა ან ბოდიშის მოხდა მოითხოვა. დავითაშვილმა კი განაცხადა, რომ იგი მინისტრისთვის ბოდიშის მოხდას არ აპირებს. 26 აპრილს, ტელეკომპანია რუსთავი 2-ის გადაცემა პოზიციაში საქართველოს პრემიერმინისტრმა განაცხადა, რომ ის დეპუტატზე გაბრაზებულია. თუმცა, 27 აპრილს პრემიერის ბიზნესცენტში შეხვედრის შემდეგ, სერგეენკომ და დავითაშვილმა განაცხადეს, რომ ინციდენტი ამოწურულია.