საქართველოს შინაგან საქმეთა სამინისტრომ სახელმწიფო საზღვარზე გადაადგილებული პირების შესახებ სტატისტიკა გამოაქვეყნა. ამ მონაცემებით, საქართველოში 2013 წლის ნოემბერში 417 522 ვიზიტი განხორციელდა, რაც 2012 წლის იმავე პერიოდის მაჩვენებელზე 12.6%-ით მეტია.
შსს-ს ცნობით. მიმდინარე წლის იანვარ-ნოემბრის ინტერვალში, ქვეყანაში 4 973 632 ვიზიტი განხორციელდა, რაც 22.6%-ით აღემატება გასული წლის ანალოგიური საანგარიშო პერიოდის მაჩვენებელს და 12.3%-ით გაასწრო 2012 სრული კალენდარული წლის მონაცემებს. ამასთან, შემოღებული პირობითი დაყოფის მიხედვით, ხვედრითი წილის ურთიერთმიმართება შემდეგია:
- ტურისტი - 1 935 767 ვიზიტი (საერთო რაოდენობის 39%, მატება წინა წლის ანალოგიურ მაჩვენებელთან 17,3%);
- ტრანზიტი - 1 094 159 ვიზიტი (საერთო რაოდენობის 22%, მატება წინა წლის ანალოგიურ მაჩვენებელთან 55,6%);
- სხვა - 1 943 706 ვიზიტი (საერთო რაოდენობის 39%, მატება წინა წლის ანალოგიურ მაჩვენებელთან 14,2%).
2013 წლის ნოემბერშიც ყველაზე მეტი ვიზიტი კვლავ თურქეთიდან (-16%), აზერბაიჯანიდან (+18,7%), სომხეთიდან (+37%), რუსეთიდან (+40,7%), უკრაინიდან (+44,6%) და ირანიდან (-3%) განხორციელდა. ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-ნოემბერში კვლავ გამოირჩნენ პოლონეთი, ჩეხეთი, ავსტრია, საფრანგეთი, გერმანია და იტალია (შესაბამისად - 75%, 32%, 25%, 20%, 17% და 16%), შუა აზიის ქვეყნებიდან - ყაზახეთის (40%), ახლო აღმოსავლეთიდან - ისრაელის (31%), ხოლო აღმოსავლეთ ევროპის ქვეყნებიდან კი - ბელარუსის მოქალაქეები 61%-იანი მატებით.
სახელმწიფო საზღვრის კვეთის მხრივ, შსს ყურადღებას საქართველოს მოქალაქეთა აქტივობის ზრდაზეც ამახვილებს, რაც მიმდინარე წლის პირველ 11 თვეში 20 (შემოსვლა) და 20,4 (გასვლა) პროცენტიან მატებაში გამოისახა.
