დევიზით, ფოტოგრაფია სამყაროს და მასში მიმდინარე მოვლენების კვლევის ბრწყინვალე საშუალებაა, Tbilisi Photo Festival-ი შემოდგომის სერიას გთავაზობთ.
2010 წელს დაარსებულმა ფესტივალმა, საიუბილეო თარიღის აღნიშვნა გაზაფხულიდან დაიწყო, ზაფხულში გააგრძელა და შემოდგომაც არ გამოტოვა. ფოტონამუშევრების გასაცნობად ორგანიზატორები - გურამ წიბახაშვილი, ნესტან ნიჟარაძე, თინა ლაღიძე, ირმა ინარიძე - დღეიდან 5 ოქტომბრის ჩათვლით გიწვევენ.
უკრაინის სოლიდარობის ნიშნად, ფესტივალი დღეს, 18:00 საათზე, ლეღვთახევში (აბანოთუბანი) გაიხსნება გამოფენით „ორი ნაპირი: უკრაინა 2014“, რომლის ავტორია იუსტინა მელნიკევიჩი. პოლონელი ფოტოგრაფი გთავაზობთ ევრომაიდნის, ყირიმის ანექსიისა და რუსეთ-უკრაინის ომის დასაწყისის ამსახველ კადრებს. ათვლის სიმბოლურ წერტილად, როგორც გავრცელებულ ინფორმაციაშია მითითებული, ავტორი ირჩევს მდინარე დნეპრს, რომელიც უკრაინის დასავლეთ და აღმოსავლეთ ნაწილებად გაყოფის მეტაფორა ხდება. მსურველთ ღია ცის ქვეშ მოწყობილი გამოფენის დათვალიერება 2 კვირის განმავლობაში შეეძლებათ.
მომდევნო ინიციატივა, „ქართული დღიურები. რობერტ კაპა საქართველოში, 1947“, ორგანიზატორებმა თიბისი ბანკთან თანამშრომლობით განახორციელეს. უნგრელი ფოტორეპორტიორის გარდაცვალების 60 წლისთავისადმი მიძღვნილი გამოფენა 3 ოქტომბერს, 19:30 საათზე, თიბისი გალერეაში გაიხსნება და ამერიკელი მწერლის - ჯონ სტაინბეკისა და რობერტ კაპას საქართველოში მოგზაურობის ამსახველ ფოტოებს შემოგთავაზებთ.
მომდევნო ექსპოზიცია წარმოგიდგენთ „უაღრესად თვითმყოფად ავტორს“, რომლის 4 ათასი ნეგატივისგან შემდგარი არქივი განადგურებას 90-იანი წლების დასაწყისში შემთხვევით გადაურჩა. რეზო კეზელის 40-60-იან წლებში გადაღებული ფოტოების დათვალიერების საშუალება 5 ოქტომბრიდან (გახსნა 18:30 საათზე ევროპის სახლში) 21 ოქტომბრამდე მოგეცემათ.
Tbilisi Photo Festival-ი საბჭოთა პერიოდის კიდევ ერთ ავტორს - ბორის შავერდიანს გაგაცნობთ, რომელსაც ორგანიზატორები „საბჭოთა პერიოდის კონცეპტუალური ფოტოგრაფიის ერთ-ერთ პიონერად“ ახასიათებენ. გამოფენა, რომელიც 4 ოქტომბერს, 19:30 საათზე, ლიტერატურის მუზეუმში გაიხსნება, იმითაც იქნება გამორჩეული, რომ ფოტოების გარდა, 80-იანი წლების ბოლოს შექმნილ ხელნაკეთ ალბომებსაც მოიცავს.
შემოდგომის სერიაში გაგრძელდება გამოფენათა ციკლი კავკასიის თემაზე. ამჯერად გვთავაზობენ იტალიელი ფოტოგრაფის - დევიდე მონტელეონეს პროექტს „Spasibo“, რომელიც ჩეჩნეთის რეალობას ასახავს და პარიზსა და არლშიც გამოიფინა. კარმინაიკის ფოტოჟურნალისტიკის პრიზის მფლობელ პროექტს 4 ოქტომბრიდან (გახსნა 19:00 საათზე, ლიტერატურის მუზეუმში) 21 ოქტომბრამდე შეაფასებთ.
ამჯერადაც, Tbilisi Photo Festival-ის უმთავრესი ღონისძიებაა ფოტოგრაფიის ღამე, რომელიც თბილისის მერიის მხარდაჭერით იმართება და ევროპელი, ამერიკელი და რეგიონის ფოტოგრაფების უახლეს ფოტოსერიებს აერთიანებს. მათ შორის აღსანიშნავი იქნება პროექტი ერაყული ქურთისტანის Metrography-ს, რომლის წევრი და დამაარსებელი კამრან ნაჟმი ისლამური სახელმწიფოს მებრძოლებს ტყვეობაში ჰყავთ.
მსოფლიოში ცნობილი ფოტოგრაფების ნამუშევრების გვერდით, მნიშვნელოვანია, რომ სწორედ ფესტივალის ფარგლებში მოგეცემათ: ვახო ხეთაგურის, გიორგი შენგელიას, დათო ქორიძის, თამარ მირიანაშვილის, გიორგი ნაკაშიძის, ანკა გუჯაბიძის, დინა ოგანოვას, დარო სულაკაურის, გიორგი გოგუას, იანა ყორბეზაშვილის, ლევან ჩხატარაშვილის, თინა კიღურაძის, გიორგი დადიანის, ოლეგიტოს, ნინო ალავიძის, თამარ კალსტოზიშვილის, მარიამ სიჭინავას ნამუშევრების დათვალიერების საშუალება.
ფოტოგრაფიის ღამისთვის განკუთვნილ ჩვენებებს 4 ოქტომბერს ძველ თბილისში (მეიდანი, შარდენის სკვერი, ერეკლე მეორის ქუჩა, ლესელიძის 28, აბო თბილელის ქუჩა, გუდიაშვილის ბაღი) ინსტალირებული ეკრანების დახმარებით ნახავთ / http://www.tbilisiphotofestival.com