გარდაბანში მიმდინარე არჩევნებზე საკუთარი არჩევანი უკვე გააკეთა ნაციონალური მოძრაობის გამგებლობის კანდიდატმა ბესიკ კახაბრიშვილმა. მისი თქმით, ხმა მისცა გარდაბნის განვითარებას.
„ხმა მივეცი გარდაბანში უმოქმედობის დასრულებას. ჩვენ ყველა ერთად გავიმარჯვებთ", - განაცხადა ბესიკ კახაბრიშვილმა.
დღეს გარდაბანში გამგებლის რიგგარეშე არჩევნები იმართება. ცენტრალური საარჩევნო კომისიის ინფორმაციით, გარდაბანში ხმის მიცემის პროცესი "მშვიდ და ყველასათვის ხელმისაწვდომ გარემოში მიმდინარეობს".
გარდაბნის საარჩევნო ოლქში ორი კანდიდატია რეგისტრირებული: ბლოკ ერთიანი ნაციონალური მოძრაობიდან ბესიკ კახაბრიშვილი, ხოლო ქართული ოცნებიდან - გოჩა ჯამარაული.
კენჭისყრის პროცესი საღამოს 20:00 სთ-ზე დასრულდება, რის შემდეგაც, საარჩევნო ადმინისტრაცია ხმის დათვლის პროცედურებს დაიწყებს. ცესკო საუბნო შემაჯამებელ ოქმებს მიღებისთანავე გამოაქვეყნებს კომისიის სპეციალურ ვებგვერდზე - results.cec.gov.ge.
