საქართველოს ახალგაზრდა იურისტთა ასოციაციის ინფორმაციით, "15:00 საათისთვის, გარდაბანში კენჭისყრის პროცესი ცალკეული შემთხვევების გარდა, მშვიდ ვითარებაში მიმდინარეობს". ამ დროისათვის საიას დამკვირვებლებმა დააფიქსირეს დაპირისპირების სამი ფაქტი, საარჩევნო უბანზე არაუფლებამოსილ პირთა ყოფნის ერთი ფაქტი, ასევე, საკონტროლო ფურცლის არასწორად შევსების ორი შემთხვევა. გარდა ამისა, საიას ინფორმაციით, რამდენიმე სადამკვირვებლო ორგანიზაციის წარმომადგენელი შეეცადა, საარჩევნო ადმინისტრაციის მუშაობაზე გავლენის მოხდენას.
"დილის საათებში დაახლოებით 11:30-დან 12:00-მდე, დაპირისპირებას ჰქონდა ადგილი გარდაბნის #4 საარჩევნო უბნის მიმდებარე ტერიტორიაზე. საიას დამკვირვებლის ინფორმაციით, ერთმანეთს ფიზიკურად დაუპირისპირდა გაურკვეველი სტატუსის მქონე 3 პირი, რომლებსაც დაახლოებით ათამდე პირი აშველებდა. მოგვიანებით, საიას დამკვირვებლის ინფორმაციით, დაპირისპირების განმუხტვას „ერთიანი ნაციონალური მოძრაობის" წარმომადგენლები შეეცადნენ, რის შემდეგაც სიტუაცია განიმუხტა. აღსანიშნავია, რომ ინციდენტის დროს პოლიცია არ გამოჩენილა და ზომები დაპირისპირების აღკვეთის მიზნით არ მიღებულა. ამ დრომდე შეინიშნება უცხო პირთა მობილიზება უბნის მიმდინარე ტერიტორიაზე.
გარდაბნის #1 უბნის შენობაში ადგილი ჰქონდა სიტყვიერ დაპირისპირებას. ერთმანეთს სიტყვიერად დაუპირისპირდნენ საარჩევნო სუბიექტის წარმომადგენელი დეპუტატი „ნაციონალური მოძრაობიდან" გიორგი ბარამიძე და ერთ-ერთი ამომრჩეველი. გიორგი ბარამიძის განცხადებით, მოქალაქე ახდენდა „ქართული ოცნების" მხარდამჭერების მობილიზებას უბანზე და აგიტაციას ეწეოდა.
ამავე უბანზე ერთმანეთს დაუპირისპირდნენ „ქართული ოცნებისა" და არასამთავრობო ორგანიზაციის „მომავლის არჩევანის" წარმომადგენლები. სიტყვიერი დაპირისპირების მიზეზი გახდა არასამთავრობო ორგანიზაციის წარმომადგენლის ბრალდება „ქართული ოცნების" წარმომადგენლის მიმართ, რომ ის კომისიის წევრის ფუნქციებში ერეოდა.
გარდაბნის #64-ე სპეც უბანზე იმყოფებოდა ვიდეო კამერით აღჭურვილი პირი, რომელმაც განაცხადა, რომ იყო მედიის წარმომადგენელი და სურდა კადრების გადაღება. როდესაც საუბნო საარჩევნო კომისიის თავმჯდომარემ მას მოსთხოვა კენჭისყრის შენობაში ყოფნის უფლების მქონე პირის ვინაობისა და სტატუსის აღმნიშვნელი სამკერდე ნიშანი (მოწმობა), მან განაცხადა, რომ არ ჰქონდა სამკერდე ნიშანი. მისივე განცხადებით, ის საქართველოს თავდაცვის სამინისტროს პრეს სამსახურს წარმოადგენდა. საუბნო კომისიამ აღნიშნული პირი უბანზე დაუშვა, თუმცა, მას შემდეგ, რაც საიას დამკვირვებელმა ზეპირი შენიშვნა დააფიქსირა არაუფლებამოსილი პირის საარჩევნო უბანზე ყოფნის ფაქტის თაობაზე, საუბნო საარჩევნო კომისიის თავმჯდომარემ ამ პირს საარჩევნო უბნის დატოვება მოსთხოვა.
გარდაბნის #4 საარჩევნო უბანზე საკონტროლო ფურცელი კანონის მოთხოვნების დარღვევით შეავსეს, რითაც დაირღვა საარჩევნო კოდექსის 61-ე მუხლის მე-10 პუნქტის მოთხოვნები. კერძოდ, კომისიის მდივანმა საკონტროლო ფურცელში უბანზე მისული პირველი ამომრჩევლის მონაცემები ისე შეიტანა, რომ არ გაარკვია პირველი ამომრჩეველი იმ უბნის ამომრჩეველი იყო თუ არა. მხოლოდ ამომრჩევლის მონაცემების საკონტროლო ფურცელში შეტანის შემდეგ გაარკვიეს კომისიის წევრებმა, რომ უბანზე მისული პირველი ამომრჩეველი #4 საარჩევნო უბნის ამომრჩეველი არ იყო. გარდა ამისა, საუბნო საარჩევნო კომისიის მდივანმა ერთი და იმავე კომისიის წევრის მონაცემები საკონტროლო ფურცელში ორჯერ შეიტანა.
სადამკვირვებლო ორგანიზაციების „ახალგაზრდა ინიციატორთა კლუბის", „მომავლის არჩევანის", „სამოქალაქო განვითარების საერთაშორისო ქსელის", „ახალგაზრდა ინიციატორთა კლუბის", „ანტიკორუფციული მედია ცენტრის," „თავისუფალი ზონის" დამკვირვებლები ცალკეულ შემთხვევებში არღვევენ ეთიკის პრინციპებს და ცდილობენ გავლენა მოახდინონ საარჩევნო ადმინისტრაციის მუშაობაზე. (1, 4, 8, 53 საარჩევნო უბნები)" - წერია საია-ს განცხადებაში.
