ეროვნულ დემოკრატიული ინსტიტუტის კვლევის თანახმად, გაზრდილია იმ გამოკითხულთა რაოდენობა, ვინც ევროკავშირში გაწევრიანებას ემხრობა. კითხვაზე, "მისაღებია თუ არა საქართველოს მთავრობის გაცხადებული მიზანი, საქართველო გახდეს ევროკავშირის წევრი", 80% დადებითად პასუხობს, რაც წინა კვლევასთან შედარებით, 8%-ით მეტია. ევროკავშირის მომხრე გამოკითხულები ფიქრობენ, რომ ევროკავშირში გაწევრიანება საქართველოს ეკონომიკას გააუმჯობესებს (59%) და ქვეყანას მეტ უსაფრთხოებას მოუტანს (36%).
ამასთან, კვლევაში მონაწილეთა 12%-სთვის მიუღებელია ევროკავშირში გაწევრიანება. მათი უმეტესობა ფიქრობს, რომ ევროკავშირში გაწევრიანება წარმოშობს კონფლიქტს რუსეთთან (43%) და საფრთხეს შეუქმნის საქართველოს ეროვნულ იდენტობას (24%).
კვლევის საველე სამუშაოები ჩატარდა 7-28 აპრილის პერიოდში, საქართველოს მასშტაბით (ოკუპირებული ტერიტორიების გამოკლებით), 2493 პირისპირ ინტერვიუს წარმომადგელობითი შერჩევის საფუძველზე. NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო. საშუალო ცდომილების ზღვარი +/- 2.7%-ია.