შინაგან საქმეთა სამინისტროს ცნობით, თვითიზოლაციის წესების დარღვევის გამო იძულებით კარანტინში 17 მარტს კიდევ 28 პირი გადაიყვანეს.
"თბილისში, იმერეთის, სამეგრელოს, კახეთის , მცხეთა-მთიანეთის, ქვემო ქართლის, შიდა ქართლის , სამცხე-ჯავახეთის, გურიისა და აჭარის რეგიონებში მოქალაქეები, რომლებმაც თვითიზოლაციის წესები დაარღვიეს, საკარანტინო ზონაში იძულებით არიან გადაყვანილი", - წერია განცხადებაში.
ჯამში, საკარანტინო ზონაში იძულებით 99 ადამიანია გადაყვანილი.
"საქართველოს ტერიტორიაზე მყოფი ყველა პირი ვალდებულია დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს და პატივი სცეს საზოგადოებრივი ჯანმრთელობის სამსახურის გადაწყვეტილებებს", - წერია შსს-ს განცხადებაში.
შინაგან საქმეთა სამინისტრო მოქალაქეებს მოუწოდებს, გამოიჩინონ მაღალი საზოგადოებრივი პასუხისმგებლობა და დაემორჩილონ აღნიშნულ რეგულაციებს.
საქართველოში კორონავირუსით ინფიცირების 38 შემთხვევაა გამოვლენილი.
