ტომ კრუზმა ჰოლივუდის უცხოური პრესის ასოციაციას(HFPA) პროტესტის ნიშნად სამივე ოქროს გლობუსი დაუბრუნა.
HFPA ორგანიზაციაა, რომელიც ყოველწლიურად კინოსა და ტელევიზიის სფეროში მოღვაწე ადამიანებს ოქროს გლობუსით აჯილდოებს. თებერვალში გამოცემა Los Angeles Times-მა ასოციაციის 87 წევრი კორუფციულ გარიგებებში ამხილა, მოგვიანებით კი გაირკვა, რომ HFPA-ს არცერთი წევრი არ არის შავკანიანი.
კრუზის გარდა, ასოციაციას ბოიკოტი მსახიობებმა - მარკ რაფალომ და სკარლეტ იოჰანსონმა გამოუცხადეს. იოჰანსონის თქმით, HFPA ღიად სექსისტური ორგანიზაციაა, რომელიც ჰარვი ვაინშტაინის ტრადიციების გამგრძელებელია ჰოლივუდში. გარდა ამისა, ოქროს გლობუსის დაჯილდოების ტრადიციულმა სატელევიზიო პარტნიორმა NBC-მ 2022 წლის ცერემონიის გაშუქებაზე უარი თქვა.
ტომ კრუზს კარიერის განმავლობაში სამი ოქროს გლობუსი აქვს მოპოვებული. 1990 წელს ფილმისთვის 4 ივლისს დაბადებული, 1997 წელს ფილმისთვის ჯერი მაკგუაიერი და 2000 წელს ფილმისთვის მაგნოლია.
