საქართველოს სტატისტიკის ეროვნული სამსახურის ინფორმაციით, 2022 წლის IV კვარტალში საქართველოში უმუშევრობის დონე წინა წლის შესაბამის პერიოდთან შედარებით 3.0%-ით შემცირდა და 16.1% შეადგინა.
სამუშაო ძალამ (ეკონომიკურად აქტიურმა მოსახლეობამ) შრომისუნარიანი ასაკის მოსახლეობის 52.7% შეადგინა, ხოლო დასაქმების დონემ - 44.2%.
დაქირავებულთა წილმა საერთო რაოდენობის 67.8% შეადგინა, თვითდასაქმებულთა კი - 32.2 პროცენტი.
საქსტატის ცნობით, ქალაქში უმუშევრობის დონე 16.4%-ს, ხოლო სოფლად უმუშევრობის მაჩვენებელი 15.5%-ს შეადგენს.
უმუშევრობის დონე ტრადიციულად მაღალია კაცებში, ქალებთან შედარებით. 2022 წლის IV კვარტალში, წინა წლის შესაბამის პერიოდთან შედარებით, აღნიშნული მაჩვენებელი ქალებში შემცირებულია 3.1%-ით, ხოლო კაცებში - 2.8 პროცენტული პუნქტით. კაცებში უმუშევრობის დონე 17.8%-ს შეადგენს, ქალებში კი - 13.8 პროცენტს.
