სტატისტიკის ეროვნული სამსახურის მონაცემებით, 2023 წლის IV კვარტალში საქართველოში უმუშევრობის დონე, წინა წლის შესაბამის პერიოდთან შედარებით, 0.7%-ით შემცირდა და 15.3%-ს გაუტოლდა.
რაც შეეხება დაქირავებულთა რიცხოვნობას, მაჩვენებელი გაიზარდა 74.3 ათასი კაცით (8.4%) და 958.4 ათასს მიაღწია, ხოლო თვითდასაქმებულთა რაოდენობა 6.6 ათასით შემცირდა (1.6%) და 413.8 ათასი გახდა.
საქსტატის ცნობით, ამავე პერიოდში უმუშევართა რაოდენობა 0.9 ათასით, ანუ 0.4%-ით შემცირდა და 248.6 ათასს მიაღწია.
ამავე მონაცემებით, 2023 წლის მეოთხე კვარტალში სამუშაო ძალის მონაწილეობის დონე (სამუშაო ძალის წილი 15 წლის და უფროსი ასაკის მოსახლეობაში) წინა წლის შესაბამის პერიოდთან შედარებით 1.7%-ით გაიზარდა და 54.3% გახდა, ხოლო დასაქმების დონემ, რომელიც 1.8%-ით გაიზარდა, 46.0% შეადგინა.
ამასთან, გასული წლის ბოლო კვარტალში სამუშაო ძალის მონაწილეობის დონე ქალაქის ტიპის დასახლებებში 1.9%-ით გაიზარდა, ხოლო სოფლის ტიპის დასახლებებში 1.2%ით. დასაქმების დონე კი ქალაქის ტიპის დასახლებებში 1.7%-ით გაიზარდა და 47.5%-ს მიაღწია, სოფლის ტიპის დასახლებებში კი 1.8-ით გაიზარდა და 43.9%-ს გაუტოლდა.
საქსტატის მონაცემებით, უმუშევრობის დონე ქალებთან შედარებით მაღალია კაცებში. ეს მაჩვენებელი ქალებში შემცირებულია 0.3%-ით, ხოლო კაცებში - 0.1%-ით და შესაბამისად 12.8%-სა და 17.7%-ს უტოლდება.
