"სახელმწიფომ მოკლა დემურ სტურუა" - ამ გზავნილით შეიკრიბნენ და ნარკოპოლიტიკა გააპროტესტეს, დღეს, თეთრი ხმაურის მოძრაობის აქტივისტები და მხარდამჭერები თბილისის სახელმწიფო კანცელარიასთან. მათი თქმით, საქართველოში მოქმედმა რეპრესიულმა ნარკოპოლიტიკამ კიდევ ერთი უდანაშაულო ადამიანი იმსხვერპლა: 22 წლის დემურ სტურუას ფიზიკური და ფსიქოლოგიური ძალადობის გამოყენებით პოლიციასთან თანამშრომლობას და თანასოფლელების დასმენას აიძულებდნენ, რამაც ის თვითმკვლელობამდე მიიყვანა.
კანცელარიიდან აქციის მონაწილეები სამტრედიაში, პოლიციის შენობასთან გადაინაცვლებენ, სადაც აქცია 17:00 საათზე დაიწყება.
კანცელარიასთან შეკრებილები მოითხოვენ:
1. პასუხისმგებლობაში მიეცეს პოლიციელი გოდერძი თევზაძე და მისი მეწყვილე, რომლის ვინაობასაც პოლიცია ამ დრომდე ასაიდუმლოებს.
2.თანამდებობა დატოვოს სამტრედიის რაიონული პოლიციის უფროსმა.
3.შსს-ს მინისტრმა საზოგადოებრივი ორგანიზეციების თანამონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის.
4.დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად.