არჩევნები 2016

2016 წლის არჩევნებში ოცნებამ იმაზე ნაკლები ხმა მიიღო, ვიდრე ენმ-მა 2012-ში

0 კომენტარი
ბიძინა ივანიშვილი ქართული ოცნების კონცერტზე ფოტო: facebook.com/KvirikashviliOfficial

2016 წლის საპარლამენტო არჩევნების წინასწარი შედეგების მიხედვით, ქართული ოცნება 48.61%-ით ლიდერობს. პარტიამ უბნების 99.41% დათვლის შედეგად ჯამში 851 945 ხმა მიიღო. მეორე ადგილზე ერთიანი ნაციონალური მოძრაობა იმყოფება, პარტიამ 27.04% ანუ 473 896 ხმა მიიღო. 5%-იან საარჩევნო ბარიერთან ახლოსაა პატრიოტთა ალიანსი, მას 87 381 ხმით 4.99% აქვს მიღებული.

2012 წლის საპარლამენტო არჩევნებში ერთიანმა ნაციონალურმა მოძრაობამ 867 432 ხმა მიიღო, რაც ხმათა 39.68%-ს შეადგენდა. ქართულმა ოცნებამ კი 2012 წელს 1.18 მილიონი ხმა მიიღო. თუ 2012 წლის საპარლამენტო არჩევნებს 8 ოქტომბერს ჩატარებულ არჩევნებს შევადარებთ დავინახავთ, რომ ოთხი წლის წინ ერთიანმა ნაციონალურმა მოძრაობამ 16 ათასი ხმით მეტი მიიღო, ვიდრე წელს ქართულმა ოცნებამ. 

წელს ამომრჩეველთა 51.61%-იანი აქტივობა დაფიქსირდა, რაც 2012 წელთან შედარებით 10%-ით ნაკლებია. წინა არჩევნების შედეგები ორ პარტიას შორის მკვეთრად კონცენტრირებული იყო, მაშინ ქართული ოცნება და ნაციონალური მოძრაობა ხმების 93.7%-ს აგროვებდნენ. წელს კი ბარიერგადალახული პარტიები ხმების 75.6%-ს იღებენ.

იმის მიუხედავად, რომ ხმები სრულად დათვლილი არაა, მაინც შეიძლება ითქვას, რომ ენმ-მა 2012 წელს იმაზე მეტი ხმა მიიღო, ვიდრე წელს ქართულმა ოცნებამ, რადგანაც სულ დაახლოებით 10 ათასი ხმა არის დასათვლელი, არჩევნებს შორის ხმათა სხვაობა კი 16 ათასია.

ახალი ვიდეო მეტი ვიდეო

ყოფილი ცოლის ცემისთვის ბათუმში 29 წლის კაცი დააკავეს (ვიდეო)

კომენტარები