ლეგენდარულ სპრინტერ უსეინ ბოლტს 2008 წლის პეკინის ოლიმპიადაზე მოგებული ოქროს მედალი ჩამოართვეს.
ამის მიზეზი მისი თანაგუნდელი ნესტა კარტერის მიერ დოპინგ ტესტზე დადებითი შედეგი გახდა. კარტერი პეკინის ოლიმპიადაზე იამაიკის სპრინტერთა 4-კაციანი გუნდის წევრი იყო, რომელმაც 4x100 მეტრ კატეგორიაში გაიმარჯვა. შესაბამისად, დოპინგ სკანდალის გამო იამაიკის გუნდს შედეგი გაუუქმდება და ბოლტის კოლექციაში 9-ის ნაცვლად 8 ოქროს მედალი დარჩება.
30 წლის სპრინტერმა 2016 წლის რიოს ოლიმპიადაზე, ოქროს მედალი სპრინტერთა სამივე კატეგორიაში მოიგო. ეს უპრეცედენტო შემთხვევაა, რადგან ბოლტმა ამის გაკეთება 2008 და 2012 წლებშიც მოახერხა, თუმცა ერთ-ერთი მედლის ჩამორთმევის შემდეგ ეს რეკორდიც კითხვის ნიშნის ქვეშ დგება.
იამაიკის ნაცვლად 2008 წლის 4x100 მეტრ კატეგორიის ოქროს მედალი ტრინიდადის და ტობაგოს გუნდს გადაეცემა.
