ევროპულმა საქართველომ პარლამენტში მცირე ბიზნესისთვის საგადასახადო შეღავათების დაწესების საკუთარი ვერსია წარადგინა.
"გაუარესებული ეკონომიკური გარემოთი დაზარალებულ მცირე და საშუალო ბიზნესს ვერ უშველის ქართული ოცნების მიერ ინიცირებული საგადასახადო ცვლილება. აუცილებელია დღგ-თი დასაბეგრი ოპერაციის საერთო თანხა 100,000 ლარიანი ზღვრიდან 200,000 ლარამდე გაიზარდოს. ამ ზღვრის აწევა მცირე ბიზნესისთვის სასიცოცხლოდ აუცილებელია,” - აცხადებს პროექტის ერთ-ერთი ავტორი ევროპული საქართველოს წევრი ზურაბ ჭიაბერაშვილი.
ჭიაბერაშვილის თქმით, მთავრობას რომ მცირე ბიზნესისთვის რეალური შეღავათის მიცემა უნდოდეს, მაშინ მიკრო ბიზნესისთის არსებულ შეღავათს - არ დაიბეგროს საერთოდ - გაავრცელებდა მცირე ბიზნესზე, როგორც ეს ევროპული საქართველოს საკანონმდებლო ინიციატივაშია მოცემული.
"იმ 1%-ის დატოვებით და არა განოლებით, როგორც ამას ჩვენი ინიციატივა ითვალისწინებს, კვირიკაშვილი საგადასახადო ინსპექციას ისევ უტოვებს მცირე ბიზნესის შემოწმების ბერკეტს. ამ 1%-ით იმდენად მცირე თანხა შევა ბიუჯეტში, რომ მას ფისკალური ეფექტი არც აქვს. უბრალოდ, კვირიკაშვილს უნდა, მთავრობას დარჩეს ბიზნესის კონტროლის ეს მექანიზმი,” - ამბობს ჭიაბერაშვილი.
ევროპული საქართველოს მცირე და საშუალო ბიზნესის მხარდაჭერის საკანონმდებლო პაკეტი ეკონომიკური ზრდის დაჩქარებაზე, უმუშევრობის შემცირებასა და მოქალაქეთა შემოსავლების ზრდაზეა ორიენტირებული.
