"ჩვენ საქართველოს ხელისუფლება დავაყენეთ ზუსტად იმ ტესტის ქვეშ, რომ ჩვენ ახლა უნდა გავაკეთოთ არჩევანი, გვინდა ვიყოთ დემოკრატიული, დასავლური სახელმწიფო, შემდგარი, სადაც ადამიანის უფლებებს იცავენ, თუ ჩვენ ვდგამთ ნაბიჯს უკან რუსეთისკენ, ან ვხდებით აზერბაიჯანი ან თურქეთი", - ამის შესახებ თბილისი პრაიდის ერთ-ერთმა ორგანიზატორმა, გიორგი თაბაგარმა რუსთავი 2-ის ეთერში ისაუბრა.
თაბაგარის თქმით, სახელმწიფო ინსტიტუციები არის საფრთხის ქვეშ. მისი შეფასებით, ლევან ვასაძე და ის საეკლესიო პირები, რომლებიც პირდაპირ ძალადობისკენ მოუწოდებენ და ატარებენ რუსეთის პოლიტიკას სერიოზული პრობლემა საქართველოსთვის, - " დანაშაულია, ეს ადამიანი უნდა იყოს ციხეში, რამდენიმე მუხლი შეესაბამება მას და ის არ უნდა დადიოდეს გარეთ და უკანონო ბანდფორმირებებს არ უნდა კრებდეს" - თქვა გიორგი თაბაგარმა.
თბილისი პრაიდის ერთ-ერთმა ორგანიზატორმა ასევე შეაფასა პრემიერმინისტრის გაცხადება, სადაც მამუკა ბახტაძემ ლგბტქ+ ადამიანების უფლებებზე ისაუბრა და აღნიშნა, რომ ეს პრობლემა გაზვიადებულია.
"როდესაც პრემიერმინისტრი სამარცხვინო განცხადებას აკეთებს და ერთ ჭრილში განიხილავს მოძალადე ჯგუფებს და საუბრობს, თითქოს, ლგბტ ადამიანებს პრობლემები არ აქვთ, როდესაც კრიზისი არის ქვეყანაში და საერთოდ, დამხობით ემუქრებიან ხელისუფლებას და ინსტიტუციების ჩამოშლის დონეზე ვართ მისული, ამ დროს საუბარი იმაზე, რომ პრობლემები არ არის ქვეყანაში და რაღაც გარედან შემოტანილია ეს ყველაფერი, არის თვალებში ნაცრის შეყრა. იგივე გააკეთა საქართველოს პრეზიდენტმაც, რომელმაც ასევე სამარცხვინო განცხადება გააკეთა" - თქვა თაბაგარმა.
შეგახსენებთ, რომ თბილისი პრაიდის ორგანიზატორების ინფორმაციით, პრაიდის კვირეული თბილისში ჩატარდება.
შინაგან საქმეთა სამინისტროში გუშინ, 18 ივნისს გამართული შეხვედრის შემდეგ, უცნობი იყო რა გადაწყვიტეს კვირეულის ორგანიზატორებმა. გიორგი თაბაგარი ამბობდა, რომ დაინახა სახელმწიფოს უსუსურობა და ამოსავალი წერტილი ადამიანების სიცოცხლეა. ამავე შეხვედრიდან გამოსულმა სახალხო დამცველმა კი აღნიშნა, რომ შსს-ში პრაიდის ორგანიზატორებს ღონისძიების გაუქმება შესთავაზეს.
ცნობისთვის, თბილისი პრაიდი რამდენიმე თვის წინ დაიგეგმა. მას შემდეგ, რაც შინაგან საქმეთა სამინისტრომ თბილისი პრაიდის ორგანიზატორებს უთხრა, რომ მათ უსაფრთხოებას ვერ უზრუნველყოფდა, მოგვიანებით კი, პატრიარქმა მიმართვა გაავრცელა, სადაც ხელისუფლებას მოუწოდა, არ დაეშვა თბილისი პრაიდის ჩატარება, ლგბტქ+ თემის ნაწილმა და აქტივისტებმა მთავრობის სახლის წინ სპონტანური აქცია დაგეგმეს, სახელწოდებით "სახელმწიფო, სად ხარ?"
აქციაზე მისულ მშვიდობიან მომიტინგეებს ადგილზე ნეოფაშისტური დაჯგუფებები და სიძულვილის ჯგუფები დახვდათ, რომლებიც მათ ემუქრებოდნენ და შეურაცხყოფას აყენებდნენ. პოლიციამ მშვიდობიან მომიტინგეებსა და სიძულვილის ჯგუფებს შორის კორდონი გააკეთა. ნეოფაშისტური დაჯგუფებები ფიზიკურ შეურაცხყოფას აყენებდნენ მედიის წარმომადგენლებს, ხოლო მშვიდობიანი აქციის მონაწილეებს რაგბის ბურთებსა და ბოთლებს ესროდნენ.
6-საათიანი კორდონის შემდეგ სიძულვილის ჯგუფები პოლიციის კორდონის გარღვევას შეეცადნენ, რა დროსაც პოლიციამ მათი 30-მდე წევრი დააკავა. პარალელურად, თბილისი პრაიდის ორგანიზატორებმა შსს-სგან მოლაპარაკებების გაგრძელების პირობა მიიღეს, რის შემდეგაც პოლიციის კორდონით გარშემორტყმულებმა ტერიტორია დატოვეს. სიძულვილის ჯგუფები და მართლმადიდებელ მშობელთა კავშირი ამის შემდეგ, დაახლოებით, ერთი საათის განმავლობაში რჩებოდა ტერიტორიაზე.
ლევან ვასაძემ კი, რომელიც რუს იდეოლოგთან, ალექსანდრე დუგინთან დაახლოებული პირია, 16 ივნისს ვერის ბაღში მხარდამჭერები, ძალადობის ჯგუფები შეკრიბა, შეკრებას "ნამდვილი კაცების აქცია" უწოდა და ძალადობისკენ მოწოდებები გააკეთა.
მან თქვა, რომ თბილისი პრაიდის წინააღმდეგ სახალხო რაზმებს შექმნიან, რომლებიც "გაინაწილებენ ქალაქს და იპატრულირებენ", მათი იარაღი კი ქამარი იქნება. "ჩვენ მათ [გეებს] შევუკრავთ ხელებს ქამრებით და მივაბრძანებთ იმ ადგილიდან, სადაც ისინი იქნებიან", - თქვა ვასაძემ.
მის ამ განცხადებაზე შსს-მ გამოძიება სისხლის სამართლის კოდექსის 223-ე, უკანონო ფორმირებების შექმნის შესახებ მუხლით დაიწყო. გამოძიების დაწყების დღესვე, ვასაძემ თქვა, რომ ქუჩებში დაანონსებულ პატრულირებას აუქმებს. თუმცა, ვასაძემ ასევე აღნიშნა, რომ მისი ჯგუფები მზადყოფნაშია.
"ნურავის ნურაფერი შეეშლება, ჩვენი ჯგუფები შედგენილია, მზადყოფნაშია და თუ ვინმე მოგვატყუებს, დაპირებულს შევასრულებთ. ტელეფონზე ერთი ღილაკის დაჭერით გავჩნდებით იქ, სადაც ადამიანები არ დაემორჩილებიან სამინისტროს ამ რეკომენდაციას და მივაბრძანებთ მათ იქიდან", - თქვა მან ვერის ბაღში.
თბილისი პრაიდი 23 ივნისის ჩათვლით გაგრძელდება და სხვადასხვა ღონისძიებას მოიცავს, მათ შორის, ღირსების მარშს.
