4 წლის ბავშვის გარდაცვალება

სანზონაში გარდაცვლილი 4 წლის ბავშვის დედას 11 წლით პატიმრობა მიესაჯა

0 კომენტარი
ფოტო: ShutterStock

თბილისის საქალაქო სასამართლომ 22 იანვარს ნაძალადევში გარდაცვლილი ბავშვის დედას 11 წლით თავისუფლების აღკვეთა მიუსაჯა. მას ბრალად ედებოდა შვილის სიკვდილამდე მიყვანა ცემით. 

პროკურატურის ინფორმაციით, მოსამართლემ ბავშვის დედა შემაკავებელი ორდერის მოთხოვნების შეუსრულებლობისთვისაც დამნაშავედ სცნო. 

"სასამართლო პროცესზე გამოკვლეული მტკიცებულებებით დადასტურდა, რომ 2019 წლის იანვრის დასაწყისიდან 22 იანვრამდე ქ.თბილისში, სანზონაში, საკუთარ საცხოვრებელ სახლში ლ.ქ. ბავშვის დამორჩილებისა და მისი ქცევის საკუთარი შეხედულებისამებრ კორექტირების მიზნით, სისტემატურად სცემდა 4 წლის შვილს ნ.ზ.-ს., რის შედეგად იგი განიცდიდა ფიზიკურ ტანჯვას.

საქმის მასალებიდან ირკვევა, რომ 2019 წლის 6 იანვარს ლ.ქ.-ის., როგორც პოტენციური მოძალადის მიმართ, 30 დღის ვადით გამოიცა შემაკავებელი ორდერი, რომლითაც მას აეკრძალა პოტენციურ მსხვერპლთან, მის შვილთან მიახლოება და მასთან კომუნიკაცია. აღნიშნულის მიუხედავად, 2019 წლის 8 იანვრიდან - 22 იანვრამდე მსჯავრდებული იმყოფებოდა ქ.თბილისში, სანზონაში არსებულ საცხოვრებელ სახლში, სადაც ასევე ცხოვრობდა ნ.ზ",- წერია უწყების მიერ გავრცელებულ განცხადებაში. 

ინფორმაცია ნაძალადევის რაიონში 4 წლის გოგოს გარდაცვალების შესახებ 2019 წლის 22 იანვარს გახდა ცნობილი. მედიის ნაწილი მეზობელზე დაყრდნობით ავრცელებდა ინფორმაციას, რომ ბავშვზე ოჯახში ფიზიკურად ძალადობდნენ და რამდენჯერმე პოლიციაც იყო გამოძახებული.

საქართველოს შინაგან საქმეთა სამინისტროს განცხადებით, ბავშვზე ძალადობის სავარაუდო ფაქტზე ოჯახში პოლიცია 6 იანვარს იმყოფებოდა. შსს-ს ინფორმაციით, 4 წლის გოგო საავადმყოფოში გადაიყვანეს და მომხდარის შესახებ აცნობეს სოციალურ სამსახურს. გარდა ამისა, უწყებაში ამბობდნენ, რომ ოჯახის წევრები ბავშვის დაზიანებებს მის ჰიპერაქტიურ ქცევას უკავშირებდნენ. შსს ხაზს უსვამს, რომ ბრალის წარდგენის მტკიცებულებითი სტანდარტის არარსებობის მიუხედავად, დედის მიმართ პოლიციამ შემაკავებელი ორდერი გამოწერა, რომლის მიხედვით მას ეკრძალებოდა არასრულწლოვანთან კონტაქტი.

22 იანვარს, ბავშვის გარდაცვალების შემდეგ, პოლიციამ დედა შემაკავებელი ორდერის მოთხოვნების შეუსრულებლობის გამო დააკავა.

სოციალური მომსახურების სააგენტოში პირველი განმარტება 23 იანვარს გააკეთეს. უწყების მეურვეობა-მზრუნველობისა და სოციალური პროგრამების დეპარტამენტის უფროსმა, მარი წერეთელმა არ უპასუხა ჟურნალისტების კითხვას, იცოდა თუ არა სააგენტომ, რომ 6 იანვარს ოჯახში ბავშვზე შესაძლო ძალადობის გამო პოლიცია იყო გამოძახებული. ის ამას გამოძიების ინტერესებს უკავშირებდა.

ამავე განცხადების დროს წერეთელმა თქვა, რომ ბავშვი 3.5 წლის განმავლობაში მინდობით აღზრდაზე იყო, რადგან დედამ მისი დაბადებისთანავე მიმართა სოციალურ სამსახურს და სოციალურ-ეკონომიკური მდგომარეობის გამო ბავშვის სახელმწიფო ზრუნვაში გადაცემა ითხოვა.

30 იანვარს კი ცნობილი გახდა, რომ 2 სოციალური მუშაკი და 2 უფროსი სოციალური მუშაკი სამსახურიდან გაათავისუფლეს, ხოლო სოციალური სააგენტოს მეურვეობა-მზრუნველობისა და სოციალური პროგრამების დეპარტამენტის უფროსმა, მარი წერეთელმა თავად დაწერა განცხადება გადადგომის შესახებ.

11 ივნისს, 4 წლის ბავშვის გარდაცვალების საქმის გამოძიების პროცესში მისი მამინაცვალიც დააკავეს. როგორც საქართველოს ​შინაგან საქმეთა სამინისტროში ტაბულას უთხრეს, გამოკითხვების და ექსპერტიზების პროცესში გამოიკვეთა, რომ კაცი სხვა ბავშვზე ძალადობდა. შესაბამისად, ეს ცალკე საქმედ გამოიყო, კაცი კი 20 მაისს დააკავეს.

მას ბრალად ედება არასრულწლოვანზე ძალადობა. კაცს აღკვეთის ღონისძიების სახით პატიმრობა აქვს შეფარდებული. სასამართლოში არსებითი განხილვის თარიღი ჯერ ცნობილი არ არის.

4 წლის ბავშვის გარდაცვალების საქმეზე შსს-მ გამოძიება საქართველოს სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.

ახალი ვიდეო მეტი ვიდეო

VIDEO: რუსი ჟურნალისტი, ალეკსანდრ ნევზოროვი განდაგანას ფონზე მაისურს GEORGIA-ს აწერს

კომენტარები