27 ივლისს მოსკოვში ოპოზიციის მშვიდობიან აქციაზე, რომელიც მაღალჩინოსნებმა არალეგალურად გამოაცხადეს, დღის 4 საათისთვის უკვე 317 ადამიანი დააკავეს.
ქალაქის მერიასთან აქცია დღის 2 საათზე უნდა დაწყებულიყო, თუმცა ასობით სპეცრაზმმა კორდონი გააკეთა და მომიტინგეებს მერიასთან მისვლის საშუალება არ მისცა.
მოგვიანებით მომიტინგეებმა კორდონი გაარღვიეს, რათა ქალაქის მერიასთან მისულიყვნენ, თუმცა პოლიცია მომიტინგეებს კვლავ აპატიმრებს.
სოციალურ ქსელში გავრცელდა ვიდეოები, სადაც ჩანს, რომ უბრალო გამვლელებიც კი, რომლებმაც აქციის გამართვის შესახებ არაფერი იცოდნენ, დაიჭირეს. ისინი გაჩხრიკეს და არ აუხსნეს, თუ რისთვის აკავებდნენ.
მომიტინგეები სკანდირებენ "სირცხვილია!"; "ყოველდღე!"; "რუსეთი პუტინის გარაშე!"; "ეს ჩვენი ქალაქია!"; "დაუშვი!"; "ჩვენ იარაღი არ გვაქვს." მომტინგეებმა რუსეთის ჰიმნიც იმღერეს.
ოპოზიციონერი ლიუბოვ სობოლი, რომელიც გუშინ გაათავისუფლეს, დღეს ისევ დაიჭირეს და უკვე ხამოვნიჩესკის სასამართლოში გადაიყვანეს. ადგილობრივი მედიიდან ვიგებთ, რომ პოლიცია ოპოზიციონერის ალექსეი ნავალნის ოფისშიც მივიდა.
პოლიციის მოთხოვნით, გარშემო არსებული კაფეები და რესტორნები დაიხურა. პოლიციამ პუშკინის მეტროს სადგურიც დაკეტა.
მოსკოვის მერიის გარშემო სპეცრაზმს კორდონი აქვს გაკეთებული. მომიტინგეები ამ დრომდე არ იშლებიან.
20 ივლისს, მოსკოვში ათასობით მომიტინგემ აქციაზე "დაუშვი" ქალაქის საკრებულოს არჩევნებზე ოპოზიციონერი კანდიდატების დარეგისტრირება და თავისუფალი, სამართლიანი ადგილობრივი არჩევნები მოითხოვა. სახაროვის გამზირზე, 20 ათასზე მეტი ადამიანი შეიკრიბა. ამ მიტინგის ერთ-ერთი ორგანიზატორი სწორედ, ნავალნი იყო. ამავე მიტინგზე, ოპოზიციონერმა თქვა, რომ თუ კი ხელისუფლება არ შეასრულებდა მომიტინგეების მოთხოვნებს და არ დაარეგისტრირებდა ოპოზიციონერ კანდიდატებს ქალაქის საკრებულოს არჩევნებზე, 27 ივლისს მიტინგი მოსკოვის მერიასთან გაიმართებოდა.
შეგახსენებთ, კანდიდატებს, რომლებსაც სექტემბერში ჩანიშნულ მოსკოვის საკრებულოს არჩევნებში მონაწილეობის მიღება სურდათ 6 ივლისის ჩათვლით 4 500 ხელმოწერა უნდა შეეგროვებინათ. ხელმოწერების შესაგროვებლად ისინი რამდენიმე კვირა კამპანიას აწარმოებდნენ. საარჩევნო კომისიაში მიტანილ ხელმოწერებზე კი მათ განუცხადეს, რომ ხელმოწერათა დიდი ნაწილი არავალიდური იყო - სახელები, მისამართები, პასპორტის დეტალები არასწორი იყო.
14 ივლისს პოლიციამ ძალადობრივად დაარბია მომიტინგეები, რომლებიც კანდიდატებთან კომისიის ხელმძღვანელის გორბუნოვის პირადად შეხვედრას ითხოვდნენ. მოსკოვის საარჩევნო კომისიასთან პოლიციამ 25 მომიტინგე დააკავა მას შემდეგ, რაც დამოუკიდებელმა და ოპოზიციის კანდიდატებმა მხარდამჭერებს მჯდომარე პროტესტის დაწყებისკენ მოუწოდეს.