იურიდიული კომიტეტის სხდომაზე უზენაესი სასამართლოს მოსამართლეობის კიდევ ერთ კანდიდატს მამუკა ვასაძეს უსმენენ, რომელიც მთავარი პროკურორის მოქმედი პირველი მოადგილეა. ევროპული საქართველოს ლიდერმა გიგა ბოკერიამ, მას დაუსვა კითხვა მნიშვნელოვანი თუ არა მოსამართლეობის კანდიდატისათვის პოლიტიკური მიუკერძოებლობა, რაზეც კანდიდატმა უპასუხა, რომ მნიშვნელოვანია, შემდეგ კი ბოკერიამ პროკურორის მოადგილეს კონკრეტული საქმეები ჩამოუთვალა და ამ საქმეებზე პროკურატურის განსხვავებულ მიდგომებზე ისაუბრა, იმის მიხედვით თუ ვინ იყო საქმეში დაზარალებული ამ მსჯავრდებული.
ბოკერია: მინდა საჯაროდ დამეთანხმოთ, რომ უზენაესი სასამართლოს მოსამართლისთვის, უვადოდ დანიშნულისთვის მითუმეტეს, ძალიან მნიშვნელოვანია პოლიტიკური მიუკერძოებლობა.
ვასაძე: გეთანხმებით.
ბოკერია: ვგულისხმობ იმას, რომ მე და ბატონი ანრი თუ ვიჩხუბებთ, ან ბატონი ანრი თუ თავს დამესხმება, თქვენ იმის გამო რომ ის ხელისუფლებაშია ხელს არ დააფარებთ მას და პირიქით, ბატონი ანრი და მისი მეგობრები, რომ წააგებენ შემდეგ არჩევნებს, ვინც მოვა ხელისუფლებაში, ჩვენ ან ვინმე სხვა, თუ ჩვენ დავესხმებით თავს, ჩვენ არ დაგვაფარებთ ხელს. ზოგჯერ აქ ესმით ხოლმე, რომ თქვენ, ჩვენ რომ ვიყავით ხელისფულებაში ჩვენკენ იყავით და ჩვენს ძალადობას დააფარებდით ხელს და ახლა მათ დააფრებთ და ხვალ კიდე ვინ იქნება იმისას, ეს ხომ მიუღებელია?
ვასაძე: მიკერძოებულობა მიუღებელია ნებისმიერ შემთხვევაში.
ბოკერია: მინდა ასეთი ჰიპოთეტური სიტუაცია წარმოიდგინოთ, მაღალი თანამდებობის პირისთვის პროკურორის მიერ გამოტანილი მძიმე ბრალის შემდეგ ან მოსამართლის მიერ გამოტანილი მსჯავრის შემდეგ, ეს პირი და მისი თანხმლები ადამიანები თავს ესხმიან და უსწორდებიან პროკურორს ან მოსამართლეს, თქვენი აზრით ეს სერიოზული დანაშაულია?
ვასაძე: რა თქმა უნდა, თუ პირისგან მოხდება პროკურორზე თავდასხმა ეს დანაშაულია და დასჯადია.
ბოკერია: წარმოიდგინეთ, რომ ძალადობრივი ჯგუფი, რომელიც ცნობილია ძალადობრივი მოქმედებებით და სიძულვილის ქადაგებით გარკვეული ჯგუფების მიმართ, თავს დაესხა პოლიციელებს, რომლებიც ხელს უშლიდნენ, რომ ფიზიკურად გასწორებოდა ამ ჯგუფს. ეს არის თუ არა სერიოზული საკითხი გამოძიებისთვის?
ვასაძე: ძალადობრივი ჯგუფები, რომლებიც თავს ესხმიან პოლიციელებს არის სერიოზული საკითხი გამოძიებისთვის.
ბოკერია: ასევე ძალადობრივი ჯგუფი თუ უსწორდება დეპუტატებს საარჩევნო პროცესის დროს და პოლიციელებს, ესეც სერიოზული საკითხია ხო?
ვასაძე: ყველა ძალადობრივი ქმედება, რაც შეიცავს დანაშაულის ნიშნებს, ექვემდებარება გამოძიებას.
ბოკერია: პირველ შემთხვევაში (პროკურორზე ან მოსამართლეზე თავდასხმა) აღკვეთის ღონისძიების მოთხოვნის საფუძველი შეიძლება არსებობდეს?
ვასაძე: კონკრეტულ აღკვეთის ღონისძიებას სჭირდება დასაბუთება.
ბოკერია: მეორე შემთხვევა რაც იყო, თუ ძალადობრივი ჯგუფი თუ ხშირად სჩადის ასეთ დანაშაულებებს ხო შეიძლება იყოს საფუძველი პატიმრობის მოთხოვნის?
ვასაძე: თუ დანაშაულებრივი ქმედება გრძელდება ან ახალი დანაშაულის ჩადენა ხდება, ამ შემთხვევაში არსებობს საფუძველი.
ბოკერია: ახალგაზრდების აქცია, რომ იყოს გარეთ, რომ გავიდე მიყვირონ რამე, მეც რომ ვუპასუხო და ჯიკაობა რომ დაიწყოს და მომკიდოს ხელი და დამისვაროს პიჯაკი, ეს მძიმე დანაშაულია?
ვასაძე: ნებისმიერი ძალადობრივი ქმედება არის დასაგმობი დანაშაული. მძიმეა თუ ნაკლებად მძიმე ეს სხვაა საკითხია.
ბოკერია: წინა ჩამოთვლილ შემთხვევებთან შედარებით მძიმეა თუ ნაკლებად მძიმე?
ვასაძე: მსუბუქი და მძიმე და ასე შემდეგ სხვა კატეგორიაა...
ბოკერია: ამ აბსტრაქტული მაგალითების უკან დგას კონკრეტული შემთხვევები, კონკრეტული შემთხვევა თქვენი მეგობარი ფარცხალაძის, რომელიც თავს დაესხა ბატონ ლაშა თორდიას, მას შემდეგ რაც თორდიამ, როგორც აუდიტორმა (მნიშვნელობა არ აქვს ეს აუდიტორია, პროკურორი თუ მოსამართლე) მის წინააღმდეგ, სწორი თუ არასწორი, დასკვნა დადო მძიმე ბრალდებით. თქვენ გქონდათ ყველა მტკიცებულება გადაღებული და იცით თქვენმა უწყებამ რა მუხლით წაუყენეთ ბრალი? ცემის მუხლით და აღკვეთის ღონისძიებად მოითხოვეთ გირაო.
მეორე შემთხვევა, რომელზეც ვსაუბრობდი "მარშისტები", რომ არიან სამშობლოს რომ იცავენ პუტინთან ერთად, რომლებიც განმეორებითად ეხსმიან ხოლმე პოლიციელებს თავს, იმათ წინააღმდეგ პროკურატურამ ადმინისტრაციული ბრალდებები გამოიყენა.
რაც შეეხება მესამე შემთხვევას, საარჩევნო უბნის წინ კორცხელში პოლიციელებს და დეპუტატებს დაესხნენ თავს და იქაც გირაო მოითხოვეთ და რაც შეეხება პიჯაკების დასვრას, თვეობით გეჯდათ ეს ადამიანები ციხეში და პატიმრობა მოითხოვეთ რადგან მმართველი გუნდის დეპუტატს ეხებოდა საქმე.
გავრილოვის ღამეს საფუძვლიანად აღშფოთებული ადამიანები, რომლებმაც დაარღვიეს კანონი მართლაც, (ჩემი პოზიცია მკაფიოა ამაზე, კანონის დარღვევა არ შეიძლება და პოლიციელებისთვის წინააღმდეგობა არ არის სწორი), მაგრამ ყველაზე მსუბუქად ვინც ჩანდა ვიდეოში, მის წინააღმდეგ მოითხოვეთ პატიმრობა და ისეთი მუხლი შეუფარდეთ 7 წლით ემუქრებოდა პატიმრობა.
ახლა მითხარით, ჩვენ რა დასკვნა უნდა გამოვიტანოთ ამ შეპირისპირებიდან? რომ თქვენ და თქვენი უწყება, (რომელსაც არ ემიჯნებით, იმედი მაქვს, ხო არ გმობთ პროკურატურას მთელი ეს წლები?!) ხართ თუ არა პოლიტიკურად მიუკერძოებლები?
ვასაძე: კონკრეტულ სისხლის სამართლის საქმეებთან დაკავშირებით ითხოვთ პასუხებს ჩემგან...
ბოკერია: მე ტენდენციაზე გთხოვთ პასუხს, რითი ახსნით იმას, რითიც დავიწყეთ და დამეთანხმებით, რომ თქვენთვის მნიშვნელობა არ უნდა ჰქონდეს კონკრეტული ადამიანები ხელისუფლებაში არიან თუ არა, ამის მიხედვით კი არ უნდა წყვეტდეთ საქმეებს, არამედ კანონის მიხედვით და რაც ჩამოვთვალე მსგავსი უამრავი მაგალითის მოყვანა შემიძლია, მაგრამ თქვენ და თქვენნაირები და თქვენი უფროსი ფარცხალაძე იყო ჩვენთან, როცა ჩვენ ვიყავით ხელისუფლებაში და როცა მაგრად მივქარეთ, რომ დამოუკიდებელი სასამართლო არ შევქმენით, ისეთი როგორიც საჭირო იყო, (თუმცა დღევანდელი გუნდისგან განსხვავებით სერიოზული ამოცანები გვქონდა სხვა, რაც არ ამართლებს ამ შეცდომას), მერე გადალაგდით ამათთან და გაქვთ იმედი, რომ ხვალ იგივე მოხდება და მე გპირდებით, რომ იგივე არ მოხდება.
მამუკა ვასაძე ერთ-ერთია უზენაესი სასამართლოს მოსამართლეობის იმ 20 კანდიდატიდან, რომელიც იუსტიციის უმაღლესმა საბჭომ პარლამენტს დასამტკიცებლად წარუდგინა. პარლამენტი კანდიდატებს უსმენს, შემდეგ კი მათ კენჭს სათითაოდ უყრის და უზენაესი სასამართლოს 20 ვაკანტურ თანამდებობაზე დანიშნავს ან არ დანიშნავს.
მოსამართლეობის კანდიდატების მოსმენა პარლამენტმა 23 სექტემბერს დაიწყო.
