ევროპული საქართველო ერთჯერადად დაარღვევს პოლიტიკურ ბოიკოტს და საგანგებო მდგომარეობის გამოცხადებისთვის ხმის მისაცემად პარლამენტში მივა.
ამის შესახებ ევროპული საქართველოს ლიდერებმა, დავით ბაქრაძემ და გიგა ბოკერიამ ისაუბრეს.
თუმცა, ბაქრაძემ განმარტა, რომ საგანგებო მდგომარეობას, შესაძლოა, ჰქონდეს "ძალიან მძიმე და არასასურველი გვერდითი ეფექტები" და სწორედ ამიტომ, ამ ნეგატიური პროცესების მინიმუმამდე დაყვანის მიზნით, საგანგებო მდგომარეობა მკაფიოდ უნდა აკმაყოფილებდეს ორ კრიტერიუმს.
"პირველ რიგში, ის მკაფიოდ უნდა იყოს ვადაში გაწერილი და მეორე, უნდა იყოს ჩამოთვლილი კონკრეტული ღონისძიებები, რა ფორმით და რა პირობებში ვრცელდება საგანგებო მდგომარეობის შეზღუდვები.
ამ ორი კრიტერიუმის დაკმაყოფილების შემთხვევაში, ჩვენ მზად ვიქნებით, მხარი დავუჭიროთ საგანგებო მდგომარეობის გამოცხადებას და მივცეთ მას ყველა ის ბერკეტი, რომელიც მას სჭირდება,"- თქვა დავით ბაქრაძემ.
დეპუტატის თქმით, ევროპულ საქართველოს კარგად ესმის, რომ ამ ბრძოლაში მთავარი პასუხისმგებლობა ხელისუფლებას ეკისრებას და, ბუნებრივია, რომ მას უნდა ჰქონდეს ყველა ის ბერკეტი, რაც ქვეყანაში აუცილებელი ღონისძიებების გატარებისა და ვირუსის დამარცხებისთვისაა საჭირო.
"ამავე დროს ყველას გვეკისრება ჩვენი პასუხისმგებლობა და დღეს არის დრო, რომ პასუხისმგებლიანმა პოლიტიკურმა ძალებმა აჩვენონ ერთიანობა ამ საქმესთან ბრძოლაში და ყველამ შეიტანოს საკუთარი წვლილი, ვისაც რა შეგვიძლია ჩვენი საზოგადოების მთავარი მტრის დამარცხებაში,"- თქვა დავით ბაქრაძემ.
გიგა ბოკერიას თქმით, ახალი კორონავირუსის გავრცელების საფრთხის წინაშე პასუხისმგებლობა ყველას ეკისრება და სწორედ ასე უნდა იქცეოდეს პასუხისმგებლიანი ოპოზიცი. მისივე თქმით, ვინაიდან ევროპული საქართველო საპარლამენტო გუნდს წარმოადგენს, ის აუცილებლად მისცემს მთავრობას ამ ინსტრუმენტს, თუმცა ვადის მკაფიოდ გაწერა დოკუმენტში მისი პოლიტიკური გუნდისთვის საკვანძო საკითხია.
"ბატონმა გიორგი გახარიამ ახსენა 1-თვიანი ვადა. ჩვენთვის მნიშვნელოვანია, რომ ეს უნდა ეწეროს დოკუმენტში. საზოგადოებას პარლამენტის მეშვეობით უნდა დარჩეს ბერკეტი ხელში, რომ გონივრული ვადის გასვლის შემდეგ ნახოს, რა გააკეთა ხელისუფლებამ, რისთვის გამოიყენა ეს მდგომარეობა, არის თუ არა გააზრებული ამ საგანგებო მდგომარეობის გაგრძელება,"- თქვა გიგა ბოკერიამ.
დეპუტატი ასევე გამოეხმაურა პრემიერმინისტრის განცხადების იმ ნაწილს, სადაც ის სახელმწიფოს მხრიდან ზოგიერთ პროდუქტზე მაქსიმალური ფასის დაწესების უფლებაზე საუბრობდა. ბოკერია მიიჩნევს, რომ ეს არასწორია, თუმცა ამის მიუხედავად, დოკუმენტს მხარს მაინც დაუჭერს.
"ჩვენ ჯერ არ განვიხილავთ ეკონომიკაში ჩარევის სტრატეგიას, რა თქმა უნდა, დავუჭერთ ამას მხარს. და შემდეგ გვექნება ისევ საქმიანი და კონკრეტული შეთავაზებები მთავრობასთან, ყველა ამ საკითხთან, განსაკუთრებით ეკონომიკასთან დაკავშირებით,"- თქვა გიგა ბოკერიამ.
პრეზიდენტმა, სალომე ზურაბიშვილმა, პრემიერმინისტრის თანახელმოწერით ახალი კორონავირუსის გავრცელების პრევენციის მიზნით, ქვეყანაში საგანგებო მდგომარეობის გამოცხადების ბრძანება უკვე გამოსცა. საგანგებო მდგომარეობა 2020 წლის 21 აპრილამდე იქნება ძალაში.
პრემიერმინისტრი თანახელმოწერით პრეზიდენტის ბრძანების გამოცემიდან საგანგებო მდგომარეობა ძალაში ავტომატურად შედის და 48 საათის განმავლობაში მოქმედებს, რომლის დროსაც ის გასაგრძელებლად პარლამენტმა უნდა დაამტკიცოს. პარლამენტი საგანგებო მდგომარეობის გამოცხადების მხარდასაჭერად დღესვე შეიკრიბება.
იმ ჩამონათვალის მიხედვით, რომელიც პრემიერმინისტრმა გახარიამ მედიას გააცნო, საგანგებო მდგომარეობა ამ შემთხვევაში არ ითვალისწინებს არც კომენდანტის საათის დაწესებას და არც გადაადგილების თავისუფლების შეზღუდვას.
საგანგებო მდგომარეობა, სხვა ზომებთან ერთად, მოიცავს 10 ადამიანზე მეტის შეკრების თავისუფლების შეზღუდვას.
შეზღუდვების ჩამონათვალი სრულად შეგიძლიათ ნახოთ აქ.
