ბოლო ორი დღეა, იტალიაში კორონავირუსით ინფიცირების და გარდაცვალების ახალი შემთხვევები იკლებს. 23 მარტის მონაცემებით, ქვეყანაში დაავადების 4,790 ფაქტი დადასტურდა. 22 მარტს ეს მონაცემი 5560 იყო, ხოლო 21 მარტს - 6557.
რაც შეეხება გარდაცვლილებს, 23 მარტს იტალიას 602 ახალი გარდაცვლილი ჰყავს, 22 მარტს ეს მაჩვენებელი 651 იყო, ხოლო 21 მარტს - 793. ქვეყანაში ეპიდემიის გავრცელების შემდეგ, ერთ დღეში დაინფიცირების და სიკვდილიანობის ყველაზე მაღალი მაჩვენებელი სწორედ 21 მარტს დაფიქსირდა.
23 მარტის მონაცემებით, ჯამურად იტალიაში გარდაცვლილთა რაოდენობა ჯამში 6,078-ია, ინფიცირებულთა კი - 63,928. აქედან 7,432 გამოჯანმრთელდა. ქვეყანას კორონავირუსისგან ყველაზე მეტი დაღუპული ჰყავს. იტალიამ 19 მარტს გადაუსწრო ჩინეთს, საიდანაც დაიწყო ეპიდემია და სადაც 3,270 პირია გარდაცვლილი.
ამ დროისთვის, იტალიაში კორონავირუსით დაავადებული 50,418 ადამიანიდან 3,204-ის მდგომარეობა სერიოზული ან კრიტიკულია.
იტალია 10 მარტიდან მთლიანად კარანტინის ზონად არის გამოცხადებული. 21 მარტიდან, ლომბარდიაში, იტალიის კორონავირუსით ყველაზე მეტად დაზარალებულ რეგიონში, ჩაკეტვის ზომების გატარების უზრუნველყოფაში სამხედროებიც ჩაერთვნენ. იტალიაში კორონავირუსით სიკვდილიანობა 8%-ია. ეს გაცილებით მაღალი მონაცემია, ვიდრე სხვა ქვეყნებში.
იტალიის ჯანმრთელობის ეროვნული ინსტიტუტის ანგარიშის მიხედვით, იტალიაში კორონავირუსით დაღუპულთა 99%-ზე მეტს სხვა დაავადება სჭირდა. ახალი ვირუსით გარდაცვლილთა საშუალო ასაკი 79.5 წელია, ინფიცირებულთა - 63 წელი. დაღუპულთა 75%-ზე მეტს მაღალი წნევა ჰქონდა, დაახლოებით 35%-ს - დიაბეტი, 1/3-ს კი, გულის დაავადება აწუხებდა.
იტალიის ჯანმრთელობის ეროვნული ინსტიტუტის ინფორმაციით, იტალიაში კორონავირუსით დაღუპულთა მხოლოდ 0.8%-ს არ ჰქონდა რამე დაავადება. 48.5%-ს სამი ან მეტი დაავადება სჭირდა, 25.6%-ს - ორი, ხოლო 25.1%-ს - ერთი მაინც.
აღსანიშნავია, რომ კვლევის შედეგად, იტალიაში კორონავირუსით დაღუპულთა 18%-ის მონაცემები შეისწავლეს.
მსოფლიოში კორონავირუსი 366,857 ადამიანს დაუდასტურდა. გარდაიცვალა - 16,098, ხოლო გამოჯანმრთელდა - 101,065.
