ბელარუსის საპრეზიდენტო არჩევნები

პროტესტის მესამე დღე ბელარუსში, დაკავებულთა რიცხვი 5000-მდე გაიზარდა [ფოტოები]

0 კომენტარი

გუშინ მინსკი დემონსტრაციების მესამე დღემ ჩაიარა. აქციის მონაწილეები ბელარუსის საპრეზიდენტო არჩევნების შედეგებს აპროტესტებენ, რომელთა თანახმადაც ალექსანდრ ლუკაშენკომ არჩევნებში ხმების 80.2% აიღო.

9 და 10 აგვისტოს აქციასთან შედარებით დემონსტრანტების რიცხვი შემცირებული იყო, თუმცა აქტიური დაპირისპირება დემონსტრანტებსა და განსაკუთრებული დანიშნულების რაზმის წევრებს შორის გაგრძელდა. სამართალდამცავებმა აქციების მონაწილეების წინააღმდეგ გამოიყენეს ცრემლსადენი გაზი, რეზინის ტყვიები, ხმოვანი ყუმბარები და წყლის ჭავლი. მინსკში ბარიკადების დასაშლელად მობილიზებული იყო მძიმე ტექნიკა. სპეციალური დანიშნულების რაზმმა ალყაში მოაქცია და ჩაკეტა მინსკის ცენტრალური უბნები სადაც დემონსტრაციების პირველ დღეებში, განსაკუთრებულად, დიდი რაოდენობით ხალხი შეიკრიბა. დემონსტრანტებმა ქალაქის გარეუბნებში გადაინაცვლეს.

10 აგვისტოს ღამეს დაიღუპა ერთი დემონსტრანტი. ბელარუსის შსს-ს ინფორმაციით, მას ხელში “გაურკვეველი ასაფეთქებელი მოწყობილობა” აუფეთქდა. 11 აგვისტოს დემონსტრანტის დაღუპვის ადგილზე აქციის წევრებმა ყვავილები მიიტანს. ისინი პოლიციამ დაარბია.

გაიზარდა დაშავებულთა და დაპატიმრებულთა რიცხვი. 9 და 10 აგვისტოს მონაცემებით, ბელარუსის მასშტაბით, სხვადასხვა ქალაქში 5000-მდე ადამიანი დააპატიმრეს. ბელარუსის ჯანდაცვის სამინისტოს განცხადებით, საავადმყოფოებში აქციებზე დაშავებულთა რიცხვი 200-მდე აღწევს.

ადგილობრივი მედია საშუალებების ინფორმაციით, აქტიურად იჭერენ და თავს ესხმიან ჟურნალისტებს. ბელარუსში დააკავეს დაახლოებით 50 ჟურნალისტი. მინსკში თავს დაესხნენ BBC-ს, Associated Press-ის, Onliner-ის Tut.by-ის, Наша Нива-ს, Белсат-ის და КП-Беларусь-ის ჟურნალისტებს. ჟურნალისტებს, რომლებსაც ჰქონდათ აკრედიტაცია, უმტვრევდნენ კამერებს და ართმევდნენ მეხსიერების ბარათებს ფოდო და ვიდეო მასალით.

11 აგვისტოს ცნობილი გახდა, რომ ოპოზიციონერი პრეზიდენტობის კანდიდატმა სვეტლანა ტიხანოვსკაიამ ქვეყანა დატოვა. მოგვიანებით გავრცელდა მისი ვიდეო მიმართვა, რომელშიც მან დემონსტრანტებს კანონის დაცვისკენ, შეკრებისგან თავის შეკავებისკენ და სიფრთხილისკენ მოუწოდა.

ბელარუსში მიმდინარე მოვლენებს გამოეხმაურა აშშ და ევროკავშირი. ევროკომისიის ხელმძღვანელმა ურსულა ფონ დერ ლეიენმა Twitter-ზე დაწერა, რომ ბელარუსის საპრეზიდენტო არჩევნები არ ყოფილა არც თავისუფალი და არც სამართლიანი. ფონ დერ ლეინმა აღნიშნა, რომ ევროკავშირი გადახედავდა ბელარუსთან ურთიერთობებს და მიიღებდა შესაბამის ზომებს.

აშშ-ის სახელმწიფო მდივანმა მაიკ პომპეომ აღნიშნა, რომ ბელარუსში ჩატარებული არჩევნები თავისუფალი და სამართლიანი არ ყოფილა.

ევროკავშირის საგარეო საქმეთა და უშიშროების პოლიტიკის უმაღლესმა წარმომადგენელმა, ჯოზეფ ბორელმა და ევროკავშირის სამეზობლოსა და გაფართოების კომისარმა, ოლივერ ვარჰეიმ დაგმეს ძალადობა და ბელარუსის ხელისუფლებას დაკავებულების გათავისუფლებისკენ მოუწოდეს.

ახალი ვიდეო მეტი ვიდეო

ყაჩაღობა ვარკეთილში - საბითუმო მაღაზიაზე თავდასხმისთვის ორი პირი დააკავეს (ვიდეო)

კომენტარები