ძლიერი წყალდიდობის გამო ფილიპინების დედაქალაქი პარალიზებულია. წყლის დონის აწევა კოკისპირულმა ტროპიკულმა წვიმებმა გამოიწვია, რაც, თავის მხრივ ტაიფუნის „საოლა“დამსახურებაა, რომელიც ფილიპინებს გასულ კვირას დაატყდა თავს და 53 ადამიანი შეიწირა, წყალდიდობის გამო დაღუპულთა რაოდენობა კი უკვე ცხრამეტს აღწევს.
მანილას 250 000 მცხოვრებმა სახლები უკვე დატოვა. დახურულია საბავშვო ბაღები, ოფისები, თითქმის ყველა მაღაზია, ასევე შეჩერებულია ბირჟის მუშაობა. მოსახლეობის ნაწილმა თავშესაფარი სკოლებსა და ტაძრებში იპოვა.
წყალდიდობამ ფილიპინების დედაქალაქის ნახევარი დააზარალა. აღსანიშნავია, რომ ზოგიერთ რაიონში წყლის დონე ორ მეტრსაც კი აღწევს.
ზოგიერთ რაიონში უსაფრთხოების მიზნით ელექტროენერგიის მიწოდება შეწყვეტილია. ამასთან, დატბორილია ქალაქის ძირითადი სატრანსპორტო არტერიები. მაშველები ამბობენ, რომ იმ ადამიანების დახმარება, რომელთაც არ შეუძლიათ, დატბორილი რაიონებიდან გამოაღწიონ, ძალიან რთულია, რადგან მათი კატერები ძლიერ დინებაში შეფერხებით მოძრაობენ.
მეტეოროლოგები დამაიმედებელ პროგნოზს აკეთებენ და აცხადებენ, რომ მანილაში კვირის ბოლოსკენ გამოიამინდებს.