დღეს ახლადაღდგენილ ბაგრატის ტაძრში კურთხევის საზეიმო ცერემონია იმართება. ცერემონიას ესწრება საქართველოს პრეზიდენტი მიხეილ სააკაშვილი. საქართველოს პრეზიდენტმა, ტაძარში მყოფთ სიტყვით მიმართა.
ტაძარში ასევე იმყოფებიან პარლამენტის თავმჯდომარე დავით ბაქრაძე, ვიცე-სპიკერი გიგი წერეთელი და საპარლამენტო უმრავლესობის წარმომადგენლები, ასევე კოალიცია ქართული ოცნების და სხვა ოპოზიციური პარტიის ლიდერები. როგორც ცნობილია ცერემონიას არ ესწრება კოალიცია ქართული ოცნების ლიდერი, ბიძინა ივანიშვილი.
კურთხევის ცერემონიაზე დასასწრებად, საქართველოს კათოლიკოს-პატრიარქმა ილია მეორემ, მთავრობისა და ოპოზიციის წარმომდგენლებს 9 სექტემბერს მოუწოდა.
,,იქნება ბაგრატის ტაძრის კურთხევა. ტაძრის ამშენებელი მეფე ბაგრატი არის საქართველოს გამაერთიანებელი. ამიტომ ყველას, პოზიციას, ოპოზიციას, მთავრობას, მხედრობას და სრულიად საქართველოს მომავალ კვირას გიწვევთ ბაგრატის ტაძარში." - აღნიშნა ილია მეორემ.
აღნიშნულთან დაკავშირებით, ბაგრატის ტაძრის ეზოდან პოლიტიკურ ოპონენტებს 14 სექტემბერს, მიხეილ სააკაშვილმაც მიმართა.
,,შევთანხმდეთ, რომ ჩვენი ქვეყნისთვის მნიშვნელოვან საკითხებში ვართ ერთად და ყველას, მტერსაც და მოყვარესაც ხმამაღლა განვუცხადოთ, რომ ყველა ჩვენგანი პირველ რიგში საქართველოს პატრიოტია და მხოლოდ ამის შემდეგ არის ქრისტიან-დემოკრატი, ლეიბორისტი, მეოცნებე, მემარჯვენე, ნაციონალი თუ მემარცხენე. ბაგრატის ტაძარი უკვე აღდგენილია, როგორც ერთიანობის, უკვდავების სიმბოლო, როგორც გატეხილის აღდგენის სიმბოლო. მე ვუერთდები პატრიარქის მოწოდებას, რომ ყველა მოვიდეთ ტაძრის კურთხევაზე. არის საკითხები, რაშიც არ შეიძლება გაყოფას გავუსვათ ხაზი.“-განაცხადა საქართველოს პრეზიდენტმა.
ბაგრატის ტაძრის აღდგენა 2009 წელს, საქართველოს პრეზიდენტის მიხეილ სააკაშვილის ინიციატივით დაიწყო.
