ილიაუნი და თსუ საქართველოს პრეზიდენტს მიმართავენ, გამოიყენოს ვეტოს უფლება პარლამენტის მიერ 19 აპრილს მიღებულ სამოქალაქო კოდექსში შესულ ცვლილებებთან მიმართებით. ორივე რექტორის მიერ ხელმოწერილი ღია წერილი დღეს, 7 მაისს უკვე გადაეგზავნა პრეზიდენტ სააკაშვილს.
როგორც დღეს გამართულ პრესკონფერენციაზე ილიას უნივერსიტეტის რექტორმა, გიგი თევზაძემ განაცხადა, ამ ცვლილებებით უნივერისტეტის ავტონომია იზღუდება.
"(ცვლილებების) მიხედვით მთავრობას უფლება ეძლევა უნივერსიტეტისა და მისი საბჭოების უკითხავად შეუცვალონ სახელმწიფო უნივერსიტეტებს იურიდიული ფორმა, ანუ კერძო სამართალის სუბიექტის სტატუსი შეიცვალოს საჯარო სამართლის სუბიექტის სტატუსად. ეს ფაქტი, რომ ამ შესწორებით უნივერსიტეტის ავტონომია იზღუდება იწვევს ჩვენს წუხილს. ამიტომ, პრეზიდენტს თხოვნით მივმართავთ, რომ დაადოს ვეტო ამ ცვლილებებს", - განაცხადა გიგი თევზაძემ.
გიგი თევზაძე აცხადებს, რომ მან ამ საკითხთან დაკავშირებით კონსულტაცია გამართა საქართველოს პარლამენტის თავმჯდომარესთანაც.
"მე მან მითხრა, რომ დამეხმარებოდა მოლაპარაკებებში, თუმცა სამივე მოსმენით, ფაქტია, რომ კანონპროექტი მიღებულია", - აღნიშნა თევზაძემ.
რექტორების მიერ ხელმოწერის ღია წერილს ტაბულა უცვლელად გთავაზობთ:
მის აღმატებულება საქართველოს პრეზიდენტს
ბ-ნ მიხეილ სააკაშვილს
07.05.2013
ბატონო პრეზიდენტო,
როგორც თქვენთვის ცნობილია, საქართველოს პარლამენტმა 2013 წლის 19 აპრილს მიიღო შემდეგი შესწორება საქართველოს სამოქალაქო კოდექსში:
„38.1.არასამეწარმეო (არაკომერციული) იურიდიული პირის სამართლებრივი ფორმის შეცვლა დაუშვებელია, გარდა იმ შემთხვევისა, როდესაც სამართლებრივი ფორმის შეცვლით ის გარდაიქმნება საჯარო სამართლის იურიდიულ პირად;
38.11 . არასამეწარმეო (არაკომერციული) იურიდული პირის გაყოფა (დაყოფა, გამოყოფა), შერწყმა (გაერთიანება, მიერთება) და ლიკვიდაცია ხორციელდება მეწარმე სუბიექტის ლიკვიდაციისათვის/რეორგანიზაციისათვის საქართველოს კანონმდებლობით დადგენილი წესით."
ეს შესწორება უფლებას აძლევს მთავრობას უხეშად ჩაერიოს არასამეწარმეო (არაკომერციული) იურიდიული პირის ფორმით არსებული უმაღლესი სასწავლებლების - სახელმწიფო უნივერსიტეტების ფუნქციონირებაში და მოახდინოს მათი რეორგანიზაცია უმაღლესი სასწავლებლის მოქმედი სუბიექტების, პროფესორების და სტუდენტების მიერ არჩეული - კოლეგიალური მმართველობითი ორგანოების დაუკითხავად და მათი ნების საწინააღმდეგოდ. ამით უქმდება უნივერსიტეტების ფუძემდებლური პრინციპი - აკადემიური თავისუფლება, რომლის უპირობო წყაროც უნივერსიტეტების თვითმმართველობაა.
გარდა ამისა, ეს შესწორება გაადვილებს მთავრობის მიერ ააიპ უმაღლესი სასწავლებლების უძრავი, მოძრავი და ინტელექტუალური საკუთრების მითვისებას: საჯარო სამართლის იურიდიული პირის ქონების სახელმწიფოს ხელში გადასვლა ბევრად უფრო ადვილი და სამართლებრივად ნაკლებად წინააღმდეგობრივი პროცესი შეიძლება გახდეს, ვიდრე ეს კერძო სამართლის სუბიექტი უნივერსიტეტის შემთხვევაშია. ამით დაირღვევა პროფესორების, მკვლევრების და სტუდენტების ერთობის მფლობელობაში მყოფი და მათ მიერ შექმნილი კერძო და ინტელექტუალური საკუთრების ხელშეუხებლობის უფლება.
როგორც თქვენთვის ცნობილია, კერძო და ინტელექტუალური საკუთრების ხელშეუხებლობა და თვითმმართველობა უმაღლესი სასწავლებლის წარმატების უპირობო და გარდაუვალი საფუძველია: ყველა არსებული აკადემიური რეიტინგით, მსოფლიოს საუკეთესო უნივერსიტეტები, დამფუძნებლის მიუხედავად, კერძო საკუთრების მფლობელნი და თვითმმართველნი არიან: მათი წარმატება უკავშირდება კერძო და ინტელექტუალური საკუთრების ხელშეუხებლობას და შეუფერხებელი განვითარების უფლებას. ინტელექტუალური და კერძო საკუთრების ხელშეუხებლობის გარეშე შეუძლებელია უნივერსიტეტის სრულყოფილი ფუნქციონირება და შესაბამისად, ქვეყანაში ცოდნაზე და ინოვაციებზე დამყარებული ეკონომიკის გაჩენა. 19 აპრილის შესწორება სპობს იმ საფუძველს, რომელიც საქართველოში ბოლო 9 წლის განმავლობაში ვითარდებოდა უნივერსიტეტებთან მიმართებაში, რამაც გამოიწვია საქართველოს უნივერსიტეტებში სწავლების და კვლევის ხარისხის უპრეცედენტო ზრდა და შესაბამისად, მათი მნიშვნელოვანი წინსვლა საერთაშორისო აკადემიურ რეიტინგში.
მეორე მხრივ, ჩვენ არ ვართ წინააღმდეგი, რომ რომელიმე უნივერსიტეტმა გადაწყვიტოს საჯარო სამართლის სუბიექტად გახდომა, სახელმწიფოსთან მჭიდრო ურთიერთობაში შესვლა და ავტონომიურობის დათმობის ხარჯზე კონკრეტული პრივილეგიების მიღება. ვფიქრობთ, რომ ამის საკანონმდებლო დონეზე დაფიქსირება შესაძლებელია, ოღონდ, საკანონმდებლო დონეზე ასევე უნდა დაფიქსირდეს, რომ ეს პროცესი უნდა განხორცილდეს უნივერსიტეტის ყველა კოლეგიალური მმართველი საბჭოს თანხმობით და სურვილით.
ამიტომ, მოგმართავთ თხოვნით, გამოიყენოთ თქვენი კონსტიტუციური უფლება და დაადოთ ვეტო სამოქალაქო კოდექსში ა.წ. 19 აპრილს შეტანილ ცვლილებას.
პატივისცემით:
ალექსანდე კვიტაშვილი
თბილისის ივანე ჯავახიშვილის სახელმწიფო უნივერსიტეტის რექტორი
გიგი თევზაძე
ილიას სახელმწიფო უნივერსიტეტის რექტორი