გერმანიის იუსტიციის მინისტრმა არ გამორიცხა ბოიკოტის გამოცხადება 2014 წლის სოჭის ზამთრის ოლიმპიადის მიმართ. ამის მიზეზი რუსეთში მიღებული ახალი კანონია გეი-პროპაგანდის აკრძალვის შესახებ.
საბინა ლოიტჰოისერ-შნარენბერგერმა Der Spiegel-ისთვის მიცემულ ინტერვიუში აღნიშნა, რომ ეს კანონი ევროპის ადამიანის უფლებათა კონვენციას ეწინააღმდეგება. "ყველა პოლიტიკოსი უნდა დაფიქრდეს, როგორ პოზიციას დაიკავებს უმცირესობების გარიყვის ასეთი პოლიტიკის მიმართ", - განაცხადა მინისტრმა.
სოჭის ოლიმპიადაზე საუბრისას შნარენბერგერმა განაცხადა, რომ სპორტსმენებს აქვთ შესაძლებლობა, არ მიიღონ მონაწილეობა შეჯიბრებებში, პოლიტიკოსებს კი - არ დაესწრონ ამ ღონისძიებას. "(ოლიმპიადაში) მონაწილეობას არავის აიძულებენ", - განაცხადა პოლიტიკოსმა.
მისი განცხადებით, რუსეთისგან იგი საერთაშორისო-სამართლებრივი ვალდებულებების შესრულებას ელის.
