ფეხბურთი

ყველაზე საინტერესო ევროპული ტრანსფერები

ირაკლი მაღრაძე
0 კომენტარი

შარშან საზაფხულო სატრანსფერო ბაზარზე ყველაზე მეტად ფრანგული PSG აქტიურობდა. შეიხმა ფული წელსაც უხვად დახარჯა, თუმცა მთავარი მაინც არსებული შემადგენლობის შენარჩუნება იყო. ეს არა მხოლოდ პარიზელთა შემთხვევაში იყო აქტუალური – ლივერპულში ბევრი მუშაობა მოუწიათ, რომ გუნდის ლიდერი, ლუის სუარესი შეენარჩუნებინათ. ამაზე მოგვიანებით, იქამდე კი ყველაზე მნიშვნელოვანით დავიწყოთ.

გარეთ ბეილისთვის ტოტენჰემი უკვე წარსულია. ამ ფეხბურთელის ამბიციებს ლონდონური კლუბი ვეღარ აკმაყოფილებდა და, აქედან გამომდინარე, ადგილის შეცვლა გადაწყვიტა. საკითხავი მხოლოდ ის იყო, ვინ მოახერხებდა უელსელის გადაბირებას. ვრცელდებოდა სხვადასხვა ვარიანტები, მათ შორის, მანჩესტერ იუნაიტედის, ბარსელონას... მაგრამ საბოლოოდ, საკუთარ გუნდში ბეილის ხილვა ყველაზე მეტად ფლორენტინო პერესმა მოინდომა, რომელმაც ფეხბურთელის სანაცვლოდ არაამქვეყნიური თანხა გადაიხადა. ინგლისური პრესის ცნობით, ჩრდილოლონდონურმა კლუბმა 100 მილიონი ევრო, ანუ 85.3 მილიონი გირვანქა მიიღო. ეს კი მსოფლიოს რეკორდია... 2009 წლის 1 ივლისს, ასევე მადრიდულმა კლუბმა, მანჩესტერ იუნაიტედს კრიშტიანუ რონალდუს ტრანსფერში 94 მილიონი ევრო გადაუხადა, რაც აქამდე ყველაზე ძვირადღირებულ ტრანსფერად ითვლებოდა.

ბეილმა ელ მადრიგალზე ვილიარეალისთვის გატანაც მოასწრო და კრიშტიანუ რონალდუსთან ჩახუტებაც. ეს ყველაფერი კარგია და მადრიდული გუნდის გულშემატკივრებს ნამდვილად უნდა უხაროდეთ კლუბში უელსელი უინგერის მისვლა, მაგრამ აქ სხვა საკითხია მნიშვნელოვანი – შეესაბამება თუ არა ფეხბურთელში გადახდილი თანხა რეალობას? ნამდვილად არა. საერთოდ, ღირს კი ამხელა თანხა – 100 მილიონი ევრო – დღეს მსოფლიოში რომელიმე ფეხბურთელი? ალბათ ორადორი მოთამაშეა – ლეო მესი და კრიშტიანუ რონალდუ. კლუბში მოსვლის შემდეგ, კარლო ანჩელოტის პირველი შენაძენი 30 მილიონ ევროდ ესპანელი ისკო იყო. მალაგას ყოფილი ფეხბურთელი ჯერჯერობით ახალ გუნდში კარგად ჩაჯდა და გოლების გატანაც მოასწრო. სამეფო კლუბს პატარა თანხა არც ასიერ ილიარამენდში გადაუხდიათ. 6-წლიანი კონტრაქტი და 32.5 მილიონი ევრო, რომელიც 23 წლის ესპანელის ყოფილმა კლუბმა, რეალ სოსიედადმა მიიღო. ეს მადრიდელთა მხრიდან ყველაზე დიდი თანხაა, რაც ოდესმე ესპანელი ფეხბურთელის ტრანსფერში გადაუხდიათ.

ნეიმარი - 57 000 000 €
სექტემბრის დასაწყისში, ესპანეთის ფეხბურთის ფედერაციიდან გამოჟონა დოკუმენტმა, რომელშიც 14 წლის ბრაზილიელი ნეიმარი იყო ნახსენები. ამ დროს ის 2 კვირით მადრიდის რეალის ასაკობრივ გუნდში ვარჯიშობდა და, როგორც შემდგომში გაირკვა, მიუხედავად იმისა, რომ ხელმძღვანელობისთვის თავის მოწონება შეძლო, მადრიდელებმა მასში 60 ათასი ევროს გადახდა არ ისურვეს. ბიჭი სამშობლოში დაბრუნდა, წელს კი სანტოსს ვუნდერკინდად შერაცხული ფეხბურთელის ყიდვის მსურველთა რიგი ედგა. მათ შორის ყველაზე მეტად ბარსელონა და ის გუნდი აქტიურობდა, რომელმაც 8 წლის წინ ხელიდან გაუშვა მისი გაფორმების შესაძლებლობა. კატალონიელებმა ნეიმარის ტრანსფერში 50 მილიონი გირვანქა გადაიხადეს და გარიგებაც შედგა. ვრცელდებოდა ინფორმაციები, რომ ბრაზილიელის ტრანსფერი რეალურად ბევრად მეტი დაჯდა, უბრალოდ, ბონუსების სისტემა და ექსტრათანხების რაოდენობა, რომელიც კონტრაქტში ჩაიდო, არ გახმაურებულა.

ასეა თუ ისე, ბარსას ახალი 11 ნომერი ჰყავს. აღარ ჰყავს დავიდ ვილა, რომელიც სასაცილო თანხად – 5.1 მილიონ ევროდ გაუშვეს მადრიდის ატლეტიკოში. ახლა მთავარი კითხვა, რაც ყველაზე ხშირად ისმის, ესაა: შეძლებს ნეიმარი ბრაზილიის ტექნიკური ჩემპიონატიდან, სადაც მეტოქე მცველები ბევრად მეტ სათამაშო სივრცეს აძლევდნენ, განსხვავებულ პრიმერა დივიზიონზე ადაპტირებას?

მას შემდეგ, რაც დარწმუნდნენ, რომ ბეილი მათია და ახლა კლუბის ბიუჯეტში 100 მილიონით ნაკლები დარჩა, მადრიდელებმა, არც მეტი, არც ნაკლები, მესუთ იოზილის გაყიდვა გადაწყვიტეს. ეს ფაქტი ახლაც ვერ მოუნელებია ესპანური გრანდის უამრავ გულშემატკივარს და ლოგიკურიცაა – გერმანელის გუნდში ყოლა ხომ უდიდესი კომფორტია. იოზილის სტატისტიკა შესანიშნავია: რეალში მისვლის შემდეგ, მას ევროპის საუკეთესო 5 ლიგის მოთამაშეებს შორის, ყველაზე მეტი საგოლე გადაცემა აქვს გაკეთებული – 47. 2010 წლის შემდეგ ჩემპიონთა ლიგაშიც პირველია ამ კომპონენტში – თანაგუნდელებს 14-ჯერ გაატანინა და მეორე ადგილზე მყოფ ზლატან იბრაჰიმოვიჩს ამ ეტაპზე 3-ით უსწრებს.

ედისონ კავანი - 64 000 000 €
რეალის გულშემატკივართა ოზილის გაყიდვის გამო გამოთქმული გაკვირვება და შოკი არაფერია იმასთან შედარებით, რაც არსენალის ფანებს დაემართათ, როდესაც გაიგეს, რომ შემდეგი 5 წლის განმავლობაში, მესუთი მეთოფე იქნება. არსენ ვენგერს 2006 წლის შემდეგ არანაირი ჯილდო არ მოუგია და თან, ამ პერიოდში, წამყვან ფეხბურთელებს ელეოდა. ფაბრეგასისა და ვან პერსის წასვლა გუნდისთვის იმის მანიშნებელი იყო, რომ პრემიერლიგისა თუ ჩემპიონთა ლიგის მოგება ფანტაზიის სფეროდან გახლდათ. ფრანგი სპეციალისტი ყოველ წელს, სხვადასხვა მეთოდებით იძვრენდა თავს – ხან ამბობდა, რომ ფული არ აქვს, ხანაც ბაზარზე არსებული ფეხბურთელების კლასს იწუნებდა. ერთხელ ისიც თქვა, კი გვინდოდა რამდენიმე ფეხბურთელის ყიდვა, მაგრამ ვერ შევძელით – ეს რთული საქმეაო. ჯერ მხოლოდ ის ფაქტი, რომ პრემიერლიგის გიგანტებთან – მანჩესტერ იუნაიტედთან, ჩელსისთან და სიტისთან მაღალი პოზიციებისთვის მებრძოლი გუნდის რეკორდული ტრანსფერი, არშავინში გადახდილი 15 მილიონი გირვანქა იყო, უკვე ბევრზე მეტყველებს.

ვენგერმა ბოლო წუთამდე მხოლოდ იაია სანოგო და მეტიუ ფლამინი გაიფორმა, ორივე უფასოდ – თავისუფალი აგენტის სტატუსით. ბოლო დღეს, არსენის თოფმაც გაისროლა და 24 წლის უნიჭიერესი გერმანელი შემტევი ნახევარმცველი ჩრდილოეთ ლონდონში გადავიდა. პრესაში გაჟღერებული ინფორმაციის თანახმად, ეს ტრანსფერი ლონდონელებს დაახლოებით 42.5 მილიონი გირვანქა დაუჯდათ, რაც, პირდაპირ რომ ვთქვათ, პატარა თანხა ნამდვილად არ არის.

იოზილის ტრანსფერი პრემიერლიგაში ყველაზე ხმაურიანი გამოდგა და მისი გადაფარვა თუნდაც იმიტომ იყო შეუძლებელი, რომ ეს შენაძენი ბაზარზე მუდმივად ინერტულმა ლონდონის არსენალმა გააკეთა. ინგლისში ბევრი საუბარი იყო იმის შესახებ, რომ მანჩესტერ იუნაიტედს უეინ რუნი დატოვებდა. თითქოს, წითელი ეშმაკების 10 ნომერიც მზად იყო ამისთვის და სხვადასხვა კლუბებიც დაეწყვნენ რიგში, მაგრამ საბოლოოდ იუნაიტედმა მისი შენარჩუნება შეძლო. ვინ იცის, იქნებ ეს უფრო მეტს ნიშნავდეს დევიდ მოიესის გუნდისთვის, ვიდრე ბელგიელი მარუან ფელაინის 27.5 მილიონ გირვანქად შეძენა...

რიკარდო კაკა
ლონდონის ჩელსიმ ტრადიციას წელსაც არ უღალატა. ლურჯებს არც დიდი თანხა დაუხარჯავთ და არც ძალიან ცოტა. ფაქტობრივად დაშლილი მახაჩყალის ანჟიდან ვილიანი 30 მილიონ გირვანქად და ანდრე შურლე ლევერკუზენიდან, 18 მილიონად – ასეთია აბრამოვიჩის წლევანდელი საზაფხულო დანახარჯები. ამას თუ დავუმატებთ კამერუნელი სამუელ ეტო'ოსა და მარკო ვან გინკელის უფასო ტრანსფერებს, გამოვა, რომ ჩელსის ისედაც სოლიდურ შემადგენლობას ძალიან კარგი შევსება აქვს.

იუვენტუსში ტევესის გაშვების შემდეგ, მანჩესტერ სიტიმ 30 მილიონად შახტარელი ფერნანდინიო გაიფორმა. 22 მილიონი დაუჯდათ ქალაქელებს სტევან იოვეტიჩი, რომელიც ფიორენტიდანად გადმოიბირეს და 20.6 მილიონი – სევილიელი ალვარო ნეგრედო. სამივე ფეხბურთელი სერიოზული ძალაა სიტისთვის, თუმცა შემადგენლობას თუ გადავხედავთ, გულშემატკივრებს სანერვიულო არაფერი აქვთ. აი, ფეხბურთელებს კი მოუწევთ ერთმანეთის ჩაჩოჩება, რომ სათადარიგოთა სკამზე არ აღმოჩნდნენ კონკურენციის გამო.

ძალიან დატვირთული ზაფხული გამოვიდა ლონდონის ტოტენჰემის ხელმძღვანელებისთვის. ლონდონელებს გარეთ ბეილის შეცვლა სჭირდებოდათ და სატრანსფერო ბაზარზე საკმაოდ იაქტიურეს. ერიკ ლამელა (რომადან, 30 მილიონი), რობერტო სოლდადო (ვალენსიადან – 26), პაულინიო (კორინთიანსიდან – 17), კრისტიან ერიკსენი (აიაქსიდან – 11.5), ვლად კირიკეში (სტიაუადან – 9.5), ასევე ეტიენ კაპუ და ნასერ ჩადლი – ეს იმ ფეხბურთელთა სიაა, ვინც ჩრდილო ლონდონელებმა ამ ზაფხულს გადაიბირეს. სოლიდურია, ვერაფერს იტყვი... ჯერ მხოლოდ დანიელი კრისტიან ერიკსენის ტრანსფერი რად ღირს, რომლის შესახებ, ბოლო წლებში ევროპაში ძალიან ბევრს საუბრობენ. ვნახოთ, როგორ მოახერხებს ანდრე ვილაშ ბოაში შედეგის მიღწევას – ამიერიდან პორტუგალიელს ამას მკაცრად მოსთხოვენ.

გონსალო იგუაინი - 41 000 000 €
ლივერპულის ყველაზე დიდი მიღწევა, ლუის სუარესის შენარჩუნებაა. ეს, ფაქტობრივად, შეუძლებელი ჩანდა, რადგან ურუგვაელს ურთიერთობა დაეძაბა მთავარ მწვრთნელ ბრენდან როჯერსთან. გუნდის შეცვლის სურვილს, როგორც პრესაში წერდნენ, სუარესი თამამად გამოთქვამდა პირად საუბრებშიც. არ ვიცი, სტივენ ჯერარდმა გადააფიქრებინა თავისი მიმართვით, რომ გუნდი არ დაეტოვებინა, თუ არსენალი არ აღმოჩნდა საკმარისად აქტიური, მაგრამ ფაქტია, რომ შესანიშნავი ურუგვაელი კვლავ მერსისაიდელია. ლივერპულმა გაიფორმა სიმონ მინოლე სანდერლენდიდან და მამადუ სახო PSG-დან 15 მილიონად. როჯერსის გუნდშია ასევე ჩელსიდან განათხოვრებული ვიქტორ მოზესი, რომელმაც ჩელსიში ფეხის მოკიდება ჯერჯერობით ვერ შეძლო.

საფრანგეთში წელსაც ბევრი დაიხარჯა. PSG-ს ამჯერად დმიტრი რიბოლოვლევის მონაკო შეუერთდა და, ჯამში, ტრანსფერებში საკმაოდ სოლიდური თანხა დაიხარჯა. პარიზელებმა, როგორც ზემოთ ვთქვი, მოახერხეს იბრაჰიმოვიჩისა და ტიაგო სილვას შენარჩუნება, რაც განხორციელებულ ტრანსფერებზე არანაკლებ მნიშვნელოვანია. იბრასთან ერთად, ამიერიდან PSG-ს სახელით გოლებს ურუგვაელი ედინსონ კავანი (55 მილიონი) გაიტანს. გუნდში რომადან მოვიდა მარქინიოსი (28) და ლუკას დინიე.

რადამელ ფალკაო - 62 000 000 €
რაც შეეხება მონაკოს, რუსი ოლიგარქის კლუბმა მადრიდის ატლეტიკოდან ძალიან მოთხოვნადი ფორვარდი, რადამელ ფალკაო შეიძინა (53), ასევე პორტუდან როდრიგესი (38.5) და ჟოაო მოუტინიო (20). უეჭველია, რომ მონაკო საფრანგეთის ჩემპიონობისთვის იბრძოლებს, შემდეგ კი ევროტურნირებზე შეეცდება ძალების მოსინჯვას. ამ ორ გიგანტთან ერთად, საინტერესო იქნება ლიონის, მარსელისა და სხვა კლუბების ბრძოლა საპრიზო ადგილებისთვის. საფრანგეთის ჩემპიონატი ძალიან საინტერესო გახდა.

კავანის ტრანსფერში აღებული ფულით, ნაპოლიმ მადრიდის რეალისგან გონსალო იგუაინი (34.5) და კალეხონი (8) შეიძინა. იუვენტუსშია მანჩესტერ სიტიდან წამოსული კარლოს ტევესი, რომლის ხელფასის გადახდაც ქალაქელებს ძალიან დიდი თანხა უჯდებოდათ. კარლიტოს ტრანსფერი დაახლოებით 10-12 მილიონი დაჯდა. ბებერმა ქალბატონმა ესპანელი ფერნანდო ლიორენტეც დაამატა შეტევით ხაზს. მიუხედავად იმისა, რომ ფიორენტინამ ლიდერი იოვეტიჩი სიტიში გაყიდა, მიუნხენის ბაიერნიდან მარიო გომესი დაახლოებით 16-17 მილიონად შეიძინა. როგორც პრესაში დაიწერა, ამდენივე გადაუხადა რომამ ეინდჰოვენს, ნახევარმცველ კევინ სტრუტმანის სანაცვლოდ.

მიუხედავად იმისა, რომ არც ბევრ სპეკულაციებს ჰქონია ადგილი და არც მრავალი მილიონი გადაუხდიათ, ეს ტრანსფერი იტალიაში ყველაზე დასამახსოვრებელი გამოდგა – კაკა კვლავ მილანელია! შესანიშნავი ნახევარმცველი, რომელიც მილანში 2003-2009 წლებში ბრწყინავდა, მადრიდის რეალში გადასვლის შემდეგ ჩრდილში მოექცა. ახლა მთავარი ინტრიგა იმაში მდგომარეობს, შეძლებს თუ არა ბრაზილიელი ძველებურ სიმაღლეზე ასვლას.

მესუთ იოზილი და არსენ ვენგერი - 50 000 000 €
ჩემპიონთა ლიგის ტიტულის მფლობელი მიუნხენის ბაიერნი ახალი მთავარი მწვრთნელის, ხოსეპ გვარდიოლას სტილზე გადაწყობას ცდილობს. ამასობაში კი გუნდში დორტმუნდის ბორუსიადან მივიდა მარიო გიოტცე (32 მილიონი), ხოლო ბარსელონადან პეპის ყოფილი ფეხბურთელი, ტიაგო ალკანტარა (22). მოკლედ, ბაიერნს ცოტა არ დაუხარჯავს იმის გათვალისწინებით, რომ ისედაც შესანიშნავი შემადგენლობა ჰყავს. ახლა ყველაფერი გვარდიოლაზეა – მისგან ხომ გულშემატკივრები მხოლოდ მოწინავე პოზიციებზე ყოფნას ელიან. რაც შეეხება დორტმუნდის ბორუსიას, გიოტცეს გაშვების შემდეგ, კლოპს დონეცკის შახტარიდან ჰენრიხ მხითარიანი მოუყვანეს (23.6). სომეხმა ფეხბურთელმა უკვე თამაშიც მოასწრო და გოლების გატანაც და ვნახოთ, იქნებ მოახერხოს კიდეც მარიო გიოტცეს სრულფასოვნად შეცვლა. ბორუსიაში მოვიდა ახალგაზრდა და პერსპექტიული ფრანგი ცენტრფორვარდი პიერ-ემერიკ ობემეიანგი (11).

მთლიანობაში, ყველაზე საინტერესო ჩემპიონატი წელს ალბათ პრემიერლიგა იქნება. წელს აქ 630 მილიონი დაიხარჯა, რაც აბსოლუტური რეკორდია. იუნაიტედს ახალი მწვრთნელი ჰყავს, რომელმაც შემადგენლობის დიდად გადახალისება არ ისურვა, არსენალმა რეკორდული ტრანსფერი განახორციელა და გუნდი გააძლიერა, მატებაა ჩელსის, სიტისა და ტოტენჰემის შემადგენლობებშიც. ძალიან საინტერესოა, რა მოხდება პრიმერა დივიზიონში, სადაც, ერთი მხრივ, ნეიმარისთვის ბრძოლაში მოგებული ბარსელონაა, მეორე მხრივ კი, მადრიდის რეალი, რომელმაც გარეთ ბეილი გაიფორმა. როგორ ითამაშებენ ეს ფეხბურთელები შიდა ჩემპიონატსა და ჩემპიონთა ლიგაზე? ძალიან საინტერესოა, ვნახოთ. ამას დავუმატოთ უძლიერესი მიუნხენის ბაიერნი, შესანიშნავი დორტმუნდის ბორუსია, იტალიური გუნდები და, რა თქმა უნდა, დიდ ფულთან ერთად, სოლიდური შემადგენლობის მქონე ფრანგული კლუბები. ამ ყველაფრიდან გამომდინარე, თითქმის ყველა ფრონტზე, წლევანდელი სეზონი საინტერესო სანახაობას გვპირდება.

ახალი ვიდეო მეტი ვიდეო

ხათო ფსუტური

კომენტარები