ილიაუნის შენობა დღეს უკვე მეორედ დაიცალეს. უნივერსიტეტში ასაფეთქებელი მოწყობილობის არსებობის თაობაზე შეტყობინება კიდევ ერთხელ შევიდა.
ევაკუირებულია როგორც უნივერსიტეტის A კორპუსი, ასევე ადმინისტრაციის (ყოფილი უცხო ენების ინსტიტუტი) შენობა.
გამნაღმველები სამძებრო სამუშაოებს უკვე ატარებენ.
ილიას სახელმწიფო უნივერსიტეტში ბომბის შესახებ ცრუ შეტყობინება დღეს, 11:00-ზეც შევიდა. სასწავლო პროცესი მალევე აღდგა.
დღესვე, ასაფეთქებელი მოწყობილობის არსებობის თაობაზე შეტყობინება შევიდა თბილისის მე-2 და 55-ე საჯარო სკოლებში. შსს-მ გამოძიება სისხლის სამართლის კოდექსის 331-ე მუხლით დაიწყო, რაც ტერორიზმის შესახებ ცრუ შეტყობინებას გულისხმობს.
შეგახსენებთ, რომ 2013 წლის სექტემბერში, 112-ზე რამდენიმე ცრუ შეტყობინება შევიდა. ცრუ შეტყობინების ავტორები ირწმუნებოდნენ, რომ ასაფეთქებელი ნივთიერება იყო სკოლებში, ტელეკომპანიებში, ასევე, საქართველოს პარლამენტში. შსს-მ ამ საქმეზე რამდენიმე არასრულწლოვანი დააკავა.
ამის გამო, პარლამენტმა ცრუ შეტყობინებაზე პასუხისმგებლობა გაამკაცრა.
