რეგიონული განვითარებისა და ინფრასტრუქტურის მინისტრის მოადგილის ნოდარ ჯავახიშვილის განცხადებით, სახელმწიფოს მიერ გამოცხადებულ ტენდერებთან დაკავშირებით, გარკვეული ეჭვები აქვს. თუმცა, როგორც მინისტრის მოადგილე კვირის პალიტრასთან ინტერვიუში აღნიშნავს, კანონმდებლობაში არ არის მითითებული, რომ სამინისტრო გამარჯვებული კომპანიების წარმომავლობითა და დამფუძნებლების ვინაობით უნდა დაინტერესდეს.
"კანონი არც იმას გვავალდებულებს, მონაწილე კომპანიების უკან სახელმწიფო მოხელეების ინტერესები ვიკვლიოთ - ჩვენთვის ამოსავალი წერტილი ტენდერში მონაწილე კომპანიის გამოცდილება და სამუშაოს ხარისხიანად შესრულებაა. შორს ვარ იმ აზრისგან, რომ სამინისტროსა და სატენდერო კომისიაში ყველა საკითხი მოწესრიგებულია და პროცესებიც გამჭვირვალედ მიმდინარეობს, მაგრამ რასაც ვხედავ და ვუყურებ, ფორმალურად ყველაფერი თითქოს სწორად კეთდება", - ამბობს ჯავახიშვილი.
კითხვაზე, რომ სწორედ ფორმალური მხარის მიღმა ჩნდება მწვავე კითხვები და რეგიონებში ტენდერებს ერთი და იგივე კომპანიები იგებენ, მინისტრის მოადგილე პასუხობს, რომ მასთან საჩივრით არავინ მისულა.
"გიდასტურებთ, რომ ხშირ შემთხვევაში ტენდერებში ერთი და იგივე კომპანია მონაწილეობს და გამარჯვებულად ცხადდება, მაგრამ თუ სხვა, დაჩაგრული კომპანიის მფლობელი ხმას არ ამოიღებს და სიმართლეს არ იტყვის, როგორ მოვიქცეთ? არც მე მომწონს, როცა ტენდერების შედეგების განხილვისას მუდმივად ერთ გამარჯვებულ კომპანიას ვაწყდები, მაგრამ ხომ გეუბნებით, ჩემთან ჯერ არავინ მოსულა, დამეხმარეთ, ტენდერიდან უსამართლოდ გამომაგდესო... თუ ვინმე სამინისტროს არ ენდობა, მე მითხრას, ტენდერებში ვინ დაჩაგრა. პირობას ვაძლევ, საკითხს ძირფესვიანად შევისწავლი. ადამიანმა საკუთარი უფლებების დასაცავად თავადვე უნდა იბრძოლოს... მაგალითად, ზემო სვანეთში ყველა სამუშაოს მხოლოდ ერთი სამშენებლო კომპანია ასრულებს და სხვა ორგანიზაცია ტენდერებში მონაწილეობის მისაღებად არც კი შემოდის. ანალოგიური ვითარებაა ონშიც, სადაც ყველა სამუშაოს ამბროლაურის გზა ასრულებს... სავარაუდოდ, სხვა კომპანიებს აშინებენ და ტენდერში მონაწილეობის უფლებას არ აძლევენ. როცა 12 სატენდერო დოკუმენტაციიდან რვა ტენდერში ერთი გამარჯვებული კომპანიის შესახებ მომდის ინფორმაცია, ტენდერის არსი უკვე დაკარგულია. ახალქალაქშიც ასე ხდება, ყველა ტენდერს ჯავახ ავტოგზა იგებს", - აცხადებს ჯავახიშვილი.
ჟურნალისტმა მინისტრის მოადგილეს უთხრა, რომ ადგილობრივების ინფორმაციით, ხშირად სამშენებლო კომპანიები გამგებლებთან არიან შეთანხმებული. მაგალითად კვირის პალიტრამ ბორჯომი მოიყვანა, სადაც ჟურნალისტის თქმით, ყველა ტენდერს კომპანია მშენებელი იგებს და "როცა ერთ-ერთი ტენდერი სხვა ორგანიზაციამ მოიგო, ადგილობრივმა სატენდერო კომისიამ მას დისკვალიფიკაცია მისცა და სამუშაო ისევ კომპანია მშენებელს გადაულოცა". ჯავახიშვილმა განაცხადა, რომ საკითხს პირადად შეისწავლის.
"ამ საკითხს პირადად შევისწავლი. თუ მსგავსი ინფორმაცია დადასტურდება, გარწმუნებთ, გამგებლების თავები დაიყრება. მეც მაქვს ინფორმაცია, რომ გამგებლების ნაწილი მამაძაღლობს, მაგრამ დასამტკიცებლად ფაქტები და კომპანიების დახმარება მჭირდება. მე მაქსიმალურად ვცდილობ, ვითარება გამოვასწორო. ამ მიზნით საკადრო ცვლილებებიც განვახორციელე - გზების დეპარტამენტის შესყიდვების სამსახურის ხელმძღვანელი სამინისტროში გადმოვიყვანე და მის ნაცვლად იქ გამოცდილი კადრი დავნიშნე. პარალელურად, ბაზის შექმნას ვცდილობ, რომლის შემდეგაც სამშენებლო ორგანიზაციები ჩვენს მოტყუებას ვეღარ შეძლებენ, დღეს კი მხოლოდ მათ მიერ მოტანილ ინფორმაციას ვეყრდნობით და არ გვაქვს შესაძლებლობა, გუშინ და დღეს მოწოდებული ინფორმაცია ერთმანეთს შევადაროთ. არც მაღალკვალიფიციური საზედამხედველო სამსახურები გვყავს, ამიტომ საკითხს პრინციპულად ვერ უდგებიან..." - თქვა ჯავახიშვილმა.