საქართველოს განათლების მინისტრი თამარ სანიკიძე იმედოვნებს, რომ ხელნაწერთა ეროვნული ცენტრის ახალი დირექტორი ზაზა აბაშიძე თანამდებობაზე უარს არ იტყვის.
"გაისმა იქ განცხადებები, რომ კომისია სუბიექტური იყო და ძირითადად ჩემი, როგორც მინისტრის გავლენის ქვეშ იმყოფებოდნენ კომისიის წევრები. ერთი შეკითხვა მინდა დავუსვა - როგორ ფიქრობს ვინმე და თავად ყოფილი ცენტრის დირექტორი, ზაზა აბაშიძეს სჭირდება ჩემი პროტექცია კომისიის წევრებთან იმისათვის, რომ მოეპოვებინა მათი ხმები? ეს განცხადება უბრალოდ სირცხვილია და შეურაცხყოფის მომყენებელია, როგორც ზაზა აბაშიძისთვის, ასევე თითოეული მეცნიერ-თანამშრომლისთვის, რომლებიც კომისიის შემადგენლობაში იყვნენ", - თქვა სანიკიძემ.
ცნობისთვის, დღეიდან ხელნაწერთა ეროვნული ცენტრის თანამშრომლები გაიფიცნენ. ცენტრის განცხადებით, დაიხურება სამკითხველო და საგამოფენო დარბაზები, საცავები, ბიბლიოთეკა და გაუქმდება ყველა დაგეგმილი ღონისძიება მანამ, სანამ თანამშრომელთა ყველა მოთხოვნა არ დაკმაყოფილდება.
"კომისიის წევრები ძირითადად შედგებოდნენ განათლების სამინისტროს წარმომადგენლებისაგან. შედეგად, მიღებულ იქნა სუბიექტური გადაწყვეტილება და დირექტორად აირჩიეს ზაზა აბაშიძე. კომისიამ არ გაითვალისწინა ხელნაწერთა ეროვნული ცენტრის თანამშრომელთა რეკომენდაცია", - აცხადებენ ხელნაწერთა ეროვნულ ცენტრში.
თანამშრომელთა მოთხოვნები შემდეგია:
"1. გაუქმდეს ხელნაწერთა ეროვნული ცენტრის დირექტორის თანამდებობაზე გამოცხადებული კონკურსის შედეგები. ხელნაწერთა ეროვნული ცენტრის თანამშრომლები სრულ უნდობლობას ვუცხადებთ განათლებისა და მეცნიერების სამინისტროს მიერ შერჩეულ კომისიას, რადგან: კომისიის უმეტესობას წარმოადგენდა სამინისტროსა და მისდამი დაქვემდებარებული უწყების წარმომადგენლები; კანდიდატ ბუბა კუდავას სააპლიკაციო საბუთებს - ქართველ და უცხოელ მეცნიერთა მრავალრიცხოვან სარეკომენდაციო წერილებს, კომისიის წევრები არ გაცნობიან; ამ ფონზე ბუნდოვანი და გაუგებარია, თუ რა კრიტერიუმებისა და რომელი კონცეფციის საფუძველზე მოხდა დირექტორის კანდიდატის შერჩევა; არ იყო გათვალისწინებული ხელნაწერთა ეროვნული ცენტრის თანამშრომელთა პოზიცია დირექტორის კანდიდატის არჩევასთან დაკავშირებით. კომისიაში ხელნაწერთა ეროვნული ცენტრის პოზიციის გამომხატველი იყო მხოლოდ ერთი პიროვნება, რაც საკმარისი არ იქნებოდა ცენტრის ინტერესების დასაცავად.
2. დაუბრუნდეს ხელნაწერთა ეროვნულ ცენტრს, მის სამეცნიერო საბჭოს, დირექტორის არჩევის უფლება. ათწლეულების განმავლობაში ხელნაწერთა ინსტიტუტი, ხოლო 2007 წლიდან ხელნაწერთა ეროვნული ცენტრის სამეცნიერო საბჭო თავად ირჩევდა დაწესებულების დირექტორს. 2011 წლიდან სამეცნიერო დაწესებულებებს დირექტორის არჩევის უფლება ჩამოერთვა. მოვითხოვთ, გაუქმდეს ამ საკითხთან დაკავშირებით კანონში შეტანილი უსამართლო ჩანაწერი და დაუბრუნდეს ხელნაწერთა ეროვნული ცენტრის თანამშრომელთა მიერ არჩეულ სამეცნიერო საბჭოს უფლება, თავად აირჩიოს ის ხელმძღვანელი, რომელიც პროფესიულად ხედავს ცენტრის განვითარების პერსპექტივას.
3. შეიცვალოს ხელნაწერთა ეროვნული ცენტრის მაკონტროლებელი უწყება. ბოლოდროინდელმა მოვლენებმა ცხადყო, რომ განათლებისა და მეცნიერების სამინისტროს ხელმძღვანელობა ვერ აცნობიერებს იმ ფუნქციებსა და პასუხისმგებლობას, რომელიც მას ეკისრება, როგორც ხელნაწერთა ეროვნული ცენტრის მაკონტროლებელ უწყებას. მოვითხოვთ, გადაეცეს ხელნაწერთა ეროვნული ცენტრის მაკონტროლებელი ფუნქცია საქართველოს პარლამენტს", - ნათქვამია განცხადებაში.
