უეფას სუპერთასი 2015

სიჭინავა: UEFA-მ biletebi.ge-ს პრობლემის გადასაწყვეტად 48-საათიანი ვადა მისცა

0 კომენტარი
ზვიად სიჭინავა ფოტო: ტაბულა

საქართველოს ფეხბურთის ფედერაციის პრეზიდენტმა ზვიად სიჭინავამ 23 მაისს, 19:00 სთ-ზე ჟურნალისტებს უთხრა, რომ ევროპული ფეხბურთის მმართველ ორგანოსთან შეთანხმებით, კომპანია biletebi.ge-ს 48-საათიანი ვადა მიეცა, რათა გამართოს სისტემა და მსურველებმა შეძლონ თბილისში გასამართი სუპერთასის ბილეთების შეძენა.

"UEFA-სთან დასრულდა მოლაპარაკება. მათ გადაწყვიტეს, რომ biletebi.ge-ს პრობლემის გადასაწყვეტად 48-საათიანი ვადა მისცენ. დანიშნულია დრო - ხუთშაბათს ექვსის ნახევარზე ჩვენ გვექნება UEFA-სთან კიდევ ერთი სატელეფონი კავშირი და იმ შემთხვევაში, თუ ამ მომენტამდე biletebi.ge არ მოაგვარებს აღნიშნულ პრობლემას, გადავალთ გეგმა ბ-ზე. თუ რაში მდგომარეობს ეს გეგმა ბ, გეტყვით ხუთშაბათს საღამოს," - თქვა ზვიად სიჭინავამ.

შეგახსენებთ, რომ Biletebi.ge-ზე სუპერთასის ბილეთების გაყიდვა გუშინ დილით, 09:00-ზე უნდა დაწყებულიყო, თუმცა საიტის სერვერმა დიდი რაოდენობით შემოსულ მომხმარებლებს ვერ გაუძლო და გაითიშა.

სუპერთასის მოსაპოვებლად, ბარსელონა და სევილია ერთმანეთს 11 აგვისტოს, თბილისის ბორის პაიჭაძის სახელობის სტადიონზე დაუპირისპირდებიან.

ახალი ვიდეო მეტი ვიდეო

ყაჩაღობა ვარკეთილში - საბითუმო მაღაზიაზე თავდასხმისთვის ორი პირი დააკავეს (ვიდეო)

კომენტარები