NDI-ის კვლევის მიხედვით, გამოკითხულთა 58% მიიჩნევს, რომ საქართველო სწორი მიმართულებით ვითარდება. 12%-ის აზრით, არაფერი არ იცვლება, 11% მიაჩნია, რომ ქვეყანას არასწორი გეზი აქვს აღებული, 18%-მა კი არ იცის, რა გზას ადგას ქვეყანა.
არჩევნების შემდეგ გამოკითხულთა 45% სრულიად, ან ნაწილობრივ ეთანხმება მოსაზრებას, რომ ადგილობრივი ხელისუფლება მათთვის მნიშვნელოვან ცვლილებებს ახორციელებს. 36% საპირისპიროს ფიქრობს, 18% კი გაურკვევლობაშია.
გამოკითხულთა უმრავლესობა, 79%, მიიჩნევს, რომ არჩევნები საქართველოში კარგად, ან მეტ-ნაკლებად კარგად ჩატარდა. 1%-ის აზრით, არჩევნები სრულად გაყალბდა, 11% კი სჯერა, რომ არჩევნებისას ნაწილობრივ იყო დარღვევები.
კითხვაზე, რომელი სამი რეფორმა იქნებოდა ყველაზე მნიშვნელოვანი საქართველოსთვის მომდევნო 6 თვის განმავლობაში - გამოკითხულთა უმრავლესობამ ჯანდაცვის რეფორმა (60%), სოფლის მეურნეობის რეფორმა (43%) და საპენსიო რეფორმა (36%) დაასახელა. გამოკითხულთა 34% მიიჩნევს, რომ მომავალი ექვსი თვის განმავლობაში ჯანდაცვის რეფორმა გატარდება. იმავე დროის მონაკვეთში 30% სოფლის მეურნეობის რეფორმებს ელის, ხოლო 29% - საპენსიო რეფორმას. განათლების სისტემაში ცვლილებებს 30% ემხრობა და აქედან 17%-ს ექვს თვეში ცვლილებების სჯერა. სასამართლო რეფორმა მხოლოდ 25%-ისთვის არის უმნიშვნელოვანესი, ხოლო 20% მიაჩნია, რომ ექვს თვეში სასამართლოს რეფორმა გატარდება.
კვლევა ამა წლის 14-25 ნოემბრის პერიოდში, საქართველოს მასშტაბით 1,947 პირისპირ ინტერვიუს წარმომადგენლობითი შერჩევის საფუძველზე ჩატარდა. მასში ასახულია მოსახლეობისთვის ყველაზე მნიშვნელოვანი საკითხები, ასევე მოსახლეობის დამოკიდებულება დემოკრატიის, რეფორმების და საგარეო თუ საშინაო პოლიტიკის საკითხების მიმართ.
კვლევაში საშუალო ცდომილების ზღვარი წარმოადგენს +/-3 პროცენტს. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს კავკასიის კვლევითი რესურსების ცენტრი (CRRC).