ესტონეთის, ლიტვის და ლატვიის პრემიერმინისტრები ბელარუსს დაჟინებით მოუწოდებენ თავისუფალი და სამართლიანი არჩევნების ჩატარებისკენ.
ესტონეთში ბალტიის ქვეყნების პრემიერმინისტრებმა შეხვედრის შემდეგ საერთო განცხადება გაავრცელეს, სადაც ამბობენ, რომ ხელახალი არჩევნები "უნდა ჩატარდეს გამჭვირვალედ, საერთაშორისო დამკვირვებლების მონაწილეობით".
მათ ბელარუსს დაჟინებით მოუწოდეს, რომ თავი შეიკავონ ძალადობისგან, გაათავისუფლონ პოლიტიკური პატიმრები და დაკავებული მომიტინგეები.
ასევე, ისინი ევროკავშირს მოუწოდებენ, რომ სანქციები დააწესონ ძალადობაზე პასუხისმგებელ პირებზე.
ევროკავშირის გაფრთხილების და პატიმრების არ გათავისუფლების შემთხვევაში, შესაძლო სანქციების დაწესებაზე საუბრის შემდეგ, ბელარუსის ხელისუფლებამ დაკავებულების გათავისუფლება დაიწყო.
აღსანიშნავია, რომ 14 აგვისტოს გავრცელდა ინფორმაცია, რომ ევროკავშირის წევრი ქვეყნების საგარეო საქმეთა მინისტრებმა ბელარუსისთვის სანქციების დაწესებას მხარი დაუჭირეს. ამის შესახებ წერს რადიო თავისუფლების ევროპის ბიუროს ხელმძღვანელი რიკარდ იოზვაკი Twitter-ზე.
ბელარუსში გათავისუფლებულები პოლიციის მხრიდან არაადამიანური მოპყრობის, მუქარისა და ცემის ფაქტებზე ყვებიან. ქალაქ ჟოდინის იზოლატორთან შეკრებილმა მოქალაქეებმა გათავისუფლებულებს საკუთარი მანქანებით სახლში წაყვანა შესთავაზეს.
ინტერნეტსივრცეში გავრცელდა სპეციალური დანიშნულების რაზმის ყოფილი წევრების ვიდეოები, რომლებიც პროტესტის ნიშნად თავიანთ ფორმებს ყრიან.
სამთავრობო არხების რამდენიმე ჟურნალისტმა სამუშაო ადგილები დატოვა.
ბელარუსი დემონსტრანტების მხარდამჭერი აქციები გამართა ლატვიასა და რუსეთში. მოსკოვში აქცია პოლიციამ დაშალა.
ბელარუსის შსს-ს განცხადებით, აქციები მართულია, მომიტინგეებს ფულს უხდიან და ამის უკან დაპატიმრებული ოპოზიციონერის ვიკტორ ბაბარიკოს შტაბი დგას, ლუკაშენკო კი ამბობს, რომ აქციებში კრიმინალური წარსულის მქონე ადამიანები მონაწილეობენ, რომლებიც ახლა უმუშევრები არიან.
აქციებზე 7000-მდე ადამიანი დააპატიმრეს. ბელარუსის ჯანდაცვის სამინისტოს განცხადებით, საავადმყოფოებში აქციებზე დაშავებულთა რიცხვი 200-ს აღწევს.
ადგილობრივი მედიასაშუალებების ინფორმაციით, აქტიურად იჭერენ და თავს ესხმიან ჟურნალისტებს. ბელარუსში დააკავეს დაახლოებით 50 ჟურნალისტი. მინსკში თავს ესხმოდენ ჟურნალისტებს, მათ შორის იყვნენ BBC-ს და Associated Press-ის კორესპონდენტებიც. ჟურნალისტებს, რომლებსაც ჰქონდათ აკრედიტაცია, უმტვრევდნენ კამერებს და ართმევდნენ მეხსიერების ბარათებს ფოტო- და ვიდეომასალით.
საპრეზიდენტო არჩევნებში ქვეყნის მოქმედმა პრეზიდენტმა, ალექსანდრ ლუკაშენკომ ხმების 80.23% მიიღო, მისმა მთავარმა ოპონენტმა, სვეტლანა ტიხანოვსკაიამ კი 9.9%, რასაც ხალხის მასობრივი პროტესტი მოჰყვა. პოლიციამ აქციების დასაშლელად ცრემლსადენი გაზი, ხმოვანი ყუმბარები, წყლის ჭავლი და რეზინის ტყვიები გამოიყენა, რის შედეგადაც გარდაიცვალა ორი, ხოლო დაშავდა ათობით ადამიანი.
ოპოზიციის მთავარმა ლიდერმა, სვეტლანა ტიხანოვსკაიამ სამოქალაქო პროტესტის გააქტიურებიდან მეორე დღეს ბელარუსი დატოვა. ტიხანოვსკაიას გუნდის ცნობით, ის პროტესტს "შესაძლო პროვოკაციების" გამო არიდებს თავს. მოგვიანებით გავრცელდა მისი ვიდეომიმართვა, რომელშიც მან დემონსტრანტებს კანონის დაცვის, შეკრებისგან თავის შეკავებისა და სიფრთხილისკენ მოუწოდა.
