ფიზიკური ძალადობა გორგი რურუაზე

გიორგი რურუას ციხეში თავს დაესხნენ [VIDEO]

პოლიტპატიმარ გიორგი რურუას N8 პენიტენციურ დაწესებულებაში სიტყვიერი შეურაცხყოფა მიაყენეს და თავს დაესხნენ. კადრებს სპეციალური პენიტენციური დაწესებულება ავრცელებს.

პენიტენციური სამსახური თავდასხმის ვიდეოს გამოქვეყნების მიზეზად ამბობს, რომ ნაციონალური მოძრაობა მომხდარის გამოყენებას "საკუთარი პოლიტიკური მიზნებისთვის ცდილობს" და ამიტომ გადაწყვიტეს კამერის ჩანაწერების გასაჯაროება. კადრების გამოქვეყნებამდე უწყებამ რურუას მიმართ სიტყვიერი და ფიზიკური შეურაცხყოფის ფაქტზე გამოძიება დაიწყო.

თავდაპირველად, გიორგი რურუაზე ციხეში თავდასხმასთან დაკავშირებით ნაციონალური მოძრაობის წევრმა, სალომე სამადაშვილმა ფორმულას ეთერში ისაუბრა.

გთავაზობთ პენიტენციური სამსახურის განცხადებას უცვლელად:

"2020 წლის 2 ნოემბერს ერთიანი ნაციონალური მოძრაობის წევრმა სალომე სამადაშვილმა და გიორგი რურუას ადვოკატმა დიმიტრი საძაგლიშვილმა გამართეს ბრიფინგი, სადაც N8 პენიტენციურ დაწესებულებაში მომხდარ ინციდენტზე ისაუბრეს და განაცხადეს, რომ ეს იყო დაგეგმილი თავდასხმა. "ჩვენ დარწმუნებული ვართ, რომ ეს იყო ხელისუფლების მხრიდან ორგანიზებული ძალადობა და თავდასხმა."განაცხადა ადვოკატმა.

შეგახსენებთ, მომხდარი ინციდენტის შესახებ სპეციალურმა პენიტენციურმა სამსახურმა უკვე გაავრცელა განცხადება, სადაც ნათქვამია, რომ ფაქტზე დაწყებულია გამოძიება და დეტალურად არის მოყვანილი ინციდენტის შესაბამისი ფაქტები.

ვინაიდან ერთიანი ნაციონალური მოძრაობა ცდილობს მომხდარის საკუთარი პოლიტიკური მიზნებისთვის გამოყენებას, ნებისმიერი სახის პოლიტიკური სპეკულაციების სამომავლოდ თავიდან ასაცილებლად, სპეციალურმა პენიტენციურმა სამსახურმა მიიღო გადაწყვეტილება, საჯარო გახადოს N8 პენიტენციურ დაწესებულებაში დღეს მომხდარი ინცინდენტის ამსახველი ვიდეომასალა. შეგახსენებთ, ფლიგელში, სადაც ინცინდენტი მოხდა, 24-საათიანი ელექტრონულ-ვიზუალური მეთვალყურეობა პატიმრობის კოდექსის შესაბამისად მიმდინარეობს.

აქვე აღვნიშნავთ, რომ გამოძიების ფარგლებში ადვოკატის თანდასწრების გარეშე გამოკითხვაზე გიორგი რურუამ უარი განაცხადა, ხოლო მისმა ადვოკატმა საძაგლიშვილმა, რომელიც მედიის წინაშე განცხადებებს აკეთებს, გამოძიების ორგანოს შეთავაზებაზე, მისულიყო საპატიმროში და დასწრებოდა გამოკითხვის პროცესს, ასევე უარი განაცხადა მოუცლელობის გამო". – წერია განცხადებაში.

კომენტარები