ჩვენ აქ ვართ იმისთვის, რომ ხაზი გავუსვათ საქართველოს მთავრობის ერთგულებას, გააგრძელოს რეფორმები და ევროპული ინტეგრაციის გზა, - განაცხადა შვედეთის საგარეო საქმეთა მინისტრმა კარლ ბილდტმა, მაია ფანჯიკიძესთან შეხვედრის დასრულების შემდეგ.
ბილდტის შეფასებით, საქართველოში ჩატარებული არჩევნები ქვეყნის განვითარების გზაზე საუკეთესო იყო.
"ჩვენ ვართ საქართველოს მეგობრები. სხვადასხვა რანგში საქართველოში ხშირად ჩამოვდივართ, უკანასკნელად ეს იყო საარჩევნო კამპანიის დროს, იმისთვის, რომ მოვახდინოთ დემონსტრირება ჩვენი ვალდებულების დემოკრატიული და ევროპული განვითარებისთვის. ჩვენ აქ ვართ იმისთვის, რომ ხაზი გავუსვათ საქართველოს მთავრობის ერთგულებას, გააგრძელოს რეფორმები და ევროპული ინტეგრაციის გზა. განვიხილეთ რეგიონალური საკითხები, ვისაუბრეთ იმ ასპექტზე, რასაც ჰქვია შიდა განვითარება. არჩევნები საერთაშორისო დამკვირვებლების თვალსაზრისით იყო საუკეთესოდ ჩატარებული საქართველოს განვითარების გზაზე. 2013 წელს საპრეზიდენტო არჩევნებზე და 2014 წელს ადგილობრივ არჩევნებში ჩვენ ველოდებით დემოკრატიული სტანდარტების კიდევ უფრო გაუმჯობესებას, ასევე ხაზი გავუსვით ფუნდამენტურ აუცილებლობას, კანონის უზენაესობას და ყველა საკითხს, რომელიც ამ თემას ეხება", - აღნიშნა შვედეთის საგარეო საქმეთა მინისტრმა კარლ ბილდტმა.
შეგახსენებთ, საქართველოში ვიზიტით იმყოფებიან შვედეთის საგარეო საქმეთა მინისტრი კარლ ბილდტი, ბულგარეთის საგარეო საქმეთა მინისტრი ნიკოლაი მლადენოვი და პოლონეთის პრეზიდენტის ადმინისტრაციის უფროსი იასეკ მიხალოვსკი.
მათ შეხვედრები გამართეს თავდაცვის მინისტრ ირაკლი ალასანიასთან და საგარეო საქმეთა მინისტრ მაია ფანჯიკიძესთან. სტუმრები სასტუმრო ქორთიარდ მარიოტში გამართულ დისკუსიასაც დაესწრებიან თემაზე - საქართველოს ევროპული მომავალი.
დიპლომატები გუშინ საქართველოს პრეზიდენტს, მიხეილ სააკაშვილს შეხვდნენ. შეხვედრას ასევე ესწრებოდა საქართველოში ევროკავშირის წარმომადგენელი ფილიპ დიმიტროვი.