ლიტვამ, რუსეთის ფედერაციას, გივი თარგამაძის ესტრადაციაზე უარი განუცხადა. ამის შესახებ გადაწყვეტილება ვილნიუსის რეგიონულმა სასამართლომ მიიღო.
სასამართლოს განაჩენი, ერთიანმა ნაციონალურმა მოძრაობამ გაავრცელა და მასში აღნიშნულია, რომ რუსეთის მთავარი პროკურატურის მოთხოვნა საქართველოს მოქალაქის გიორგი თარგამაძის რუსეთში ექსტრადაციის შესახებ, დაფუძნებული იყო გადაწყვეტილებაზე, ’’რომლის მიხედვითაც გიორგი თარგამაძეს ბრალი ედება ძალადობის, დარბევის, ხანძრის გაჩენის, საკუთრების განადგურების, იარაღის და ფეთქებადი საშუალებების გამოყენებით გადატრიალების ორგანიზებაში. თუმცა, რუსული პროკურატურის ინფორმაციით, რიგი ფაქტორების გამო თარგამაძემ დაგეგმილი ვერ განახორციელა’’.
ლიტვის სასამართლოს განაჩენში განმარტებულია, რომ 19 მარტს გივი თარგამაძე თავად გამოცხადდა ლიტვის პროკურატურაში.
"თარგამაძე აცხადებდა, რომ ეს სისხლის სამართლებრივი დევნა განპირობებული იყო პოლიტიკური მიზეზებით, რომელიც საქართველოს პარლამენტში მის საქმიანობას უკავშირდებოდა. გიორგი თარგამაძის მიხედვით, რუსეთის გადაწყვეტილება, დაეწყო მისი სისხლის სამართლებრივი დევნა განპირობებული იყო რუსეთის ხელისუფლების მტრული დამოკიდებულებით მის მიმართ რუსეთის ხელისფულებისადმი მისი ოპოზიციური განწყობის გამო როგორც ომამდე ასევე ომის შემდეგ, ასევე სხვადასხვა პოსტ-საბჭოთა ქვეყნებში დემოკრატიულ პროცესებში მისი მონაწილეობის გამო",-აღნიშნულია ლიტვის სასამართლოს განაჩენში.
ლიტვის მთავარმა პროკურატურამ უარი განაცხადა თარგამაძის ექსტრადაციაზე რუსეთის ფედერაციისთვის, ვინაიდან "ის დანაშაულებრივი ქმედება რომელიც გიორგი თარგამაძის მიმართ სისხლის სამართლებრივი დევნის დაწყების დაწყების საფუძველი გახდა, შეესაბამება ლიტვის რესპუბლიკის სისხლის სამართლის კოდექსის 21-ე მუხლის პირველ პარაგრაფს და 283-ე მუხლის მეორე ნაწილს და არ არის სისხლის სამართლის დანაშაული ლიტვის რესპუბლიკაში".
გარდა ამისა, ლიტვის სასამართლო საქმეში პოლიტიკურ სარჩულზეც საუბრობს.
„სასამართლოსთვის მიწოდებული მონაცემების შეფასებისას, მნიშვნელოვანია აღვნიშნოთ, რომ გიორგი თარგამაძე რუსეთში შეიძლება იდევნებოდეს პოლიტიკური ნიშნითაც. ეს მტკიცდება ფაქტით, რომ რუსეთის ინტერპოლის ეროვნული ბიუროს მიერ გიორგი თარგამაძეზე საერთაშორისო ძებნის გამოცხადება ზემოთაღნიშნული დანაშაულებში მონაწილეობის გამო შეწყდა მას შემდეგ, რაც ინეტრპოლის მთავარმა სამდივნომ ცნო, რომ აღნიშნული ძებნა იყო პოლიტიკური მიზეზით და წინააღმდეგობაში მოდიოდა ინტერპოლის კონსტიტუციის მე-3 მუხლთან, რომელიც სასტიკად უკრძალავს ორგანიზაციას პოლიტიკური, სამხედრო, რელიგიური ან რასობრივი ხასიათის საქმეებში რაიმე ტიპის ჩარევას. იგივე მიზეზით, გიორგი თარგამაძეზე ძებნა შეწყდა ლიტვის კრიმინალური პოლიციის ბიუროს საერთაშორისო ურთიერთობების განყოფილების მიერ, რომელიც აწარმოებდა ძებნას ლიტვის რესპუბლიკაში“, - აღნიშნულია განაჩენში.
’’ლიტვის რესპუბლიკის სისხლის სამართლის საპროცესო კოდექსის 31-ე მუხლის, 71-ე მუხლის მე-3 ნაწილის, 1-ლი ქვეპუნქტის და 73-ე მუხლის პირველი ნაწილის მიხედვით, სასამართლო იღებს შემდგომ გადაწყვეტილებას:
იწონებს ლიტვის რესპუბლიკის მთავარი პროკურატურის მიერ 2013 წლის 15 აპრილს გამოცემულ გადაწყვეტილებას, რომ უარი ეთქვას რუსეთის ფედერაციას საქართველოს მოქალაქის გიორგი თარაგამაძის, დაბადებული 1968 წლის 23 ივლისს საქართველოში, მცხოვრები ქ. თბილისში, საქართველოში, ექსტრადაციაზე მის მიმართ სისხლის სამართლებრივი დევნის განხორციელების მიზნით.
გადაწყვეტილება საბოლოოა და გასაჩივრებას არ ექვემდებარება", - ნათქვამია სასამართლოს განცხადებაში.
გივი თარგამაძე