საერთაშორისო გამჭვირვალობა-საქართველო ფინანსთა სამინისტროს საბაჟო ტერიტორიაზე საქონლის გადაადგილებასთან დაკავშირებით წლის დასაწყისში მიღებული ბრძანების მყისიერად გაუქმებისკენ მოუწოდებს.
ორგანიზაციის ცნობით, 8 მაისს ნოდარ ხადურმა ხელი მოაწერა ბრძანებას, რომელიც აუქმებს ადრე მიღებული რეგულაციებს, რომელთა აღსრულების შედეგად მნიშვნელოვანი პრობლემები შეექმნათ ადგილობრივ მცირე და საშუალო გადამზიდველებს, საქართველოს ფოსტა კი უპირატეს მდგომარეობაში იქნა ჩაყენებული.
TI-საქართველო გავრცელებულ განცხადებაში აღშფოთებას გამოთქვამს იმის გამო, რომ რეგულაციები უქმდება არა მყისიერად, არამედ მხოლოდ 2014 წლის 1 იანვრიდან, "მაშინ, როდესაც ბაზარზე მცირე და საშუალო გადამზიდველები სავარაუდოდ აღარც იარსებებენ".
განცხადებაში ასევე აღნიშნულია, რომ ორგანიზაცია სამინისტროს მიერ ამ რეგულაციების შემოტანას თავიდანვე აკრიტიკებდა და ბრძანების გაუქმების მოთხოვნით სასამართლოში საჩივარიც შეიტანა:
"29 აპრილს სასამართლო სხდომაზე ფინანსთა სამინისტროს წარმომადგენლებმა განაცხადეს, რომ სამინისტროში შექმნილი სამუშაო ჯგუფის მიერ სადავო აქტში ცვლილებების განხორციელების შემდგომ აღარ იარსებებდა დავის გაგრძელების საჭიროება. ამ არგუმენტით ფინანსთა სამინისტროს წარმომადგენლებმა სასამართლო სხდომის გახსნისთანავე იშუამდგომლეს პროცესის 2 კვირით გადადებაზე. ასევე, ფინანსთა სამინისტრომ პირობა დადო, რომ მოაგვარებდა მომჩივანი გადამზიდველების პრობლემას და მათ ნორმალურად მუშაობის შესაძლებლობას მისცემდა".
TI-საქართველო მიიჩნევს, რომ ბრძანების მოგვიანებით ძალაში შესვლა გადამზიდველებისა და საზოგადოების მოტყუებაა და მიზნად არ ისახავს პრობლემის მოგვარებას, რადგან:
მომავალი 8 თვის განმავლობაში ამ ბაზრიდან პრაქტიკულად განდევნილი იქნება ყველა მცირე და საშუალო მეწარმე, მათ მიყენებული ექნებათ სერიოზული ფინანსური ზიანი და აღარ ექნებათ ბაზარზე დაბრუნების პერსპექტივა. ამ დროის განმავლობაში კი ბაზარზე უპირატეს მდგომარეობას საბოლოოდ განიმტკიცებს "საქართველოს ფოსტა";
მომავალი 8 თვის განმავლობაში ასევე ძალაში რჩება ის საბაჟო რეგულაციები, რომლებიც მიღებული იქნა მოქმედი კანონმდებლობის დარღვევით. მათი ძალაში დატოვება კი ეწინააღმდეგება ქვეყნის კანონმდებლობას და შეუსაბამობაში მოდის საქართველოს მიერ საერთაშორისო ხელშეკრულებებით ნაკისრ ვალდებულებებთან;
ამასთან ერთად, არათანმიმდევრულია თავად ფინანსთა მინისტრის მიერ დღეს ხელმოწერილი ბრძანება, რომელიც საბაჟო ადმინისტრირების კონკრეტული წესების სავარაუდო გაუქმების შესახებ 8 თვით ადრე გამოიცემა, მაშინ როცა იმავე საბაჟო ადმინისტრირების წესების ამოქმედება პრაქტიკულად შესაბამისი ბრძანების გამოქვეყნებიდან 6 დღეში მოხდა.
ბრძანება, რომლის საფუძველზე საქართველოს საბაჟო ტერიტორიაზე საქონლის შემოტანასთან/გატანასთან და დეკლარირებასთან დაკავშირებულ პროცედურებში არსებითი ცვლილებები შევიდა, ფინანსთა მინისტრმა 2013 წლის 25 იანვარს გამოსცა.