ყოფილი პრემიერის ვანო მერაბიშვილის განცხადებით, მისთვის ცნობილი გახდა, რომ დღევანდელი მთავრობა გეგმავს ახალციხეში რაბათის ციხის ოქროსფერი გუმბათის დემონტაჟს. როგორც მერაბიშვილმა დღევანდელ სასამართლო სხდომაზე თქვა, ეს ოქროს გუმბათი არ არის რომელიმე ერთი ცალკეული შენობის გუმბათი. ყოფილი პრემიერი აღნიშნავს, რომ ეს არის მთელი კომპლექსის და უფრო მეტიც, ახალი კონცეფციის - ქართული იერუსალიმის - გვირგვინი.
"ახალციხეში არასდროს ერთდროულად არ ფუნქციონირებდა ყველა ის დაწესებულება, რომლის თავმოყრაც ახლა, ჩვენს დროს მოხერხდა. ერთ ადგილას თავმოყრილია განახლებული მეჩეთი, მართლმადიდებლური და კათოლიკური ეკლესია. იგეგმებოდა იქვე მდებარე სინაგოგის რესტავრაცია და განახლებული ქუჩებითა და შენობებით ამ ყველაფრის ერთმანეთთან, ერთ კომპლექსში გაერთიანება. ამ ყველაფერს ახალციხის, სამცხე-ჯავახეთის და იქ მცხოვრები ადამიანების განვითარება, დასაქმება და პერსპექტივა უნდა მოეტანა. ყველაფერ ამის სიმბოლოს, სწორედ ეს ოქროს გვირგვინი წარმოადგენდა. ახალციხეს, როგორც მესხეთის დედაქალაქს ბევრი ნგრევა აქვს ნანახი. ახალციხეზე ყოველთვის გადიოდა ისტორიული დაპირისპირების ფრონტი. მე-8 საუკუნიდან ეს მხარე და ეს ქალაქი მოწინავე კულტურული და რელიგიური ცენტრი იყო. მე-16 საუკუნეში აქ ისლამი გაბატონდა. გადაწყდა, წაშლილიყო ქრისტიანული კვალი ახალციხეში, ეკლესიები მეჩეთებად გადაკეთდა, ხოლო თავად ციხე ტყვეთა სავაჭრო ადგილად აქციეს. ის ხალხი, ვინც მაშინ ეკლესიებს ანგრევდა, უცხოელი დამპყრობლები არ ყოფილან. ისინიც გამაჰმადიანებული ქართველები იყვნენ. მოგვიანებით, ახალციხე რუსული იმპერიის ნაწილი გახდა. და კიდევ ერთხელ, ამჯერად რუსული იმპერიის სამსახურში მყოფი ქართველების ხელით, ისლამის კვალის წასაშლელად მეჩეთები ეკლესიებად გადააკეთეს. მოგვიანებით, კომუნისტები დაეუფლნენ ამ მხარეს და მათაც დაიწყეს წარსულის კვალის წაშლა. არაერთგზის დანგრეული და გადაკეთებული ეკლესიები დახურეს და ციხის ტერიტორიაზე სამხედრო ჰოსპიტალი განათავსეს. ესეც ძველის სიძულვილით კეთდებოდა და ვინც ამას აკეთებდა, ისინიც ქართველები იყვნენ - ქართველები, რომელთაც სძულდათ წარსული და მისი წაშლა ჰქონდათ განზრახული. დღესაც იგივე მეორდება. ისევ ქართველები, ჩვენი ზიზღით, ჩვენი კვალის წასაშლელად, ჩვენს ჯინაზე ანადგურებენ რაბათს. ჯერ იქ განთავსებული ობიექტები მიზანმიმართულად დახურეს. ახლა კი, კომპლექსის მთავარი სიმბოლოს დემონტაჟი განიზრახეს. მოვუწოდებ ხელისუფლებას, თუ ამ კომპლექსის და ქალაქის განვითარებას არ აპირებენ, ნგრევისგან მაინც შეიკავონ თავი. დღევანდელი ხელისუფლება ამ ნგრევას სხვადასხვა ტერმინებით და მიზნებით ნიღბავს. მუსულმანებს, რუსებს და კომუნისტებსაც საკმარისი მიზეზები და საბაბები ჰქონდათ, როდესაც ანგრევდნენ. ამას ისინი განახლებას, წარსულისგან გათავისუფლებას და სამართლიანობის აღდგენას არქმევდნენ. ადრე თუ გვიან, დარწმუნებული ვარ, ყველანი მივხვდებით, ისევე როგორც ევროპელები მიხვდნენ შუა საუკუნეების მიჯნაზე, რომ შეუძლებელია, ნგრევამ სიკეთე და განვითარება მოიტანოს. 21-ე საუკუნეში კონკრეტული შენობების დანგრევით ისტორიის წაშლა შეუძლებელია", - განაცხადა მერაბიშვილმა.
ცნობისთვის, კულტურისა და ძეგლთა დაცვის მინისტრის გურამ ოდიშარიას თქმით, რაბათის ციხეზე, შესაძლოა, გუმბათის ფერი და გისოსები შეიცვალოს. მისივე თქმით, ციხის რესტავრაციის პროცესში თურქი სპეციალისტები ითხოვდნენ, გუმბათი ოქროსფრად არ შეღებილიყო. მინისტრის ინფორმაციით, ისტორიული გისოსები ჩანაცვლდა მოგვირისტებული, ჩახლართული გისოსებით, რაც ამ არქიტექტურისთვის დამახასიათებელი არ არის. აღნიშნულის შესახებ მან 13 ნოემბრის პრესკონფერენციაზე ისაუბრა.
