საქართველოს მთავარი პროკურატურის ინფორმაციით, გამოძიება "ცენტრ პოინტის" საქმეზე 182-ე მუხლის მეორე ნაწილის "ა" და მესამე ნაწილის "ბ" ქვეპუნქტებითაა დაწყებული, რაც წინასწარი შეთანხმებით ჯგუფის მიერ დიდი ოდენობით ქონების გაფლანგვას გულისხმობს და სასჯელის სახედ და ზომად თავისუფლების აღკვეთას 7-11 წლამდე ვადით ითვალისწინებს. როგორც პროკურორმა კოკა კაციტაძემ ბრიფინგზე თქვა, საგამოძიებო ორგანომ სასამართლოს მაია რჩეულიშვილის, გურამ რჩეულიშვილის, "ცენტრ პოინტი აჭარას" დირექტორების ირაკლი მინდელის და სალომე ჩარკვიანის დაკავების შუამდგომლობით მიმართა, რაც ნაწილობრივ დაკმაყოფილდა. უწყების ცნობით, სასამართლომ მხოლოდ მაია რჩეულიშვილის დაკავების შუამდგომლობა არ დააკმაყოფილა, რის გამოც, პროკურორის თქმით, მის მიმართ დაკავების გარეშე დაიწყო სისხლისსამართლებრივი დევნა.
"ბრალდების მხარემ შუამდგომლობა კანონით გათვალისწინებულ სხვა საფუძვლებთან ერთად დაასაბუთა იმ გარემოებების გათვალისწინებით, რომ ბრალდებული მაია რჩეულიშვილი და მასთან დაკავშირებული პირები მენაშენეებს მოუწოდებენ, რომ საგამოძიებო ორგანოს მიაწოდონ ცრუ ინფორმაცია, რომ თითქოსდა მათი კანონიერი ინტერესები დაკმაყოფილებულია და არანაირი სახის პრეტენზია არ გააჩნიათ, რითაც ცდილობენ გამოძიების შეცდომაში შეყვანას. ასევე მოწმეთა ჩვენებით დგინდება, რომ მაია რჩეულიშვილი და შპს "ცენტრ პოინტ ჯგუფის" სხვა წარმომადგენლები კვლავაც დამატებით ითხოვენ თანხებს მენაშენეებისაგან, რამაც კვლავაც შეიძლება, დააზარალოს ისინი; ამავდროულად, მენაშენეებისაგან დამატებით მოზიდულ თანხებს ასევე ეუფლებიან შპს "ცენტრ პოინტ ჯგუფის" დამფუძნებლები და მათთან დაკავშირებული პირები", - წერია განცხადებაში.
როგორც უწყების განცხადებაშია ნათქვამი, ვინაიდან გურამ რჩეულიშვილი თავს არიდებს საგამოძიებო ორგანოში გამოცხადებას, მის მიმართ დაუსწრებლადაა დადგენილება გამოტანილი ბრალდებულად პასუხისგებაში მიცემის შესახებ და კანონმდებლობით გათვალისწინებული პროცედურების დაცვით მის მიმართ გამოცხადდება ძებნა.
"ჩატარებული გამოძიებით დადგინდა, რომ მრავალფუნქციური სამშენებლო საქმიანობის განხორციელების მიზნით მაია რჩეულიშვილის და რუსუდან კერვალიშვილის მიერ დაფუძნდა კომპანია "ცენტრ პოინტი ჯგუფი". პრესასა თუ მედიაში გასული რეკლამების შესაბამისად, აღნიშნული ჯგუფის მიზანს დაბალი ფასითა და მაღალი ხარისხით მრავალი საცხოვრებელი ბინის აშენება წარმოადგენდა, შედეგად მრავალმა მოქალაქემ მიმართა "ცენტრ პოინტ ჯგუფს" ჯერ კიდევ არაშენებული ბინების შეძენის სურვილით.
შპს "ცენტრ პოინტი ჯგუფის" ფილიალის შპს "ცენტრ პოინტი აჭარა" დირექტორებს წარმოადგენდნენ: 2004 წლის 23 ივლისიდან - 2006 წლის 28 ნოემბრამდე პერიოდში სალომე ჩარკვიანი, ხოლო 2006 წლის 28 ნოემბრიდან - ირაკლი მინდელი. დირექტორები დანაშაულებრივ კავშირში იყვნენ შპს "ცენტრ პოინტი ჯგუფის" დამფუძნებელ პარტნიორთან მაია რჩეულიშვილთან და სამეთვალყურეო საბჭოს თავმჯდომარესთან გურამ რჩეულიშვილთან და მოქმედებდნენ მათი მითითებით. შპს "ცენტრ პოინტ აჭარას" ბათუმში სამი ობიექტის მშენებლობა უნდა განეხორციელებინა, კერძოდ კი, საცხოვრებელი სახლები უნდა აშენებულიყო პუშკინისა და ბაგრატიონის ქუჩებზე, ხოლო რუსთაველის ქუჩაზე საცხოვრებელი კომპლექსი "თეთრი მაგნოლია".
შპს "ცენტრ პოინტ ჯგუფის" მიერ გაწეული სარეკლამო კამპანიით 2005 წლის 2 მაისიდან - 2010 წლის 8 სექტემბრამდე პერიოდში მოქალაქეებისგან მოზიდულ იქნა ფულადი სახსრები 64 219 606 ლარის ოდენობით. მიუხედავად იმისა, რომ აღნიშნული თანხები უნდა მიმართულიყო მშენებლობისთვის, 2004 წლის 23 ივლისიდან - 2006 წლის 28 ნოემბრამდე პერიოდში სალომე ჩარკვიანმა სალაროდან, მენაშენეთა მიერ შეტანილი თანხა 3 756 017.41 ლარის ოდენობით არამიზნობრივად გაფლანგა და თანხა არ მოხმარდა კონკრეტული ობიექტის მშენებლობას. გამოძიებით ასევე დადგინდა, რომ ფილიალის დირექტორად ირაკლი მინდელის დანიშვნის შემდეგ, მან 2006 წლის 28 ნოემბრიდან - 2010 წლის ოქტომბრამდე პერიოდში არამიზნობრივად გაფლანგა შპს "ცენტრ პოინტ აჭარას" მენაშენეთა მიერ საცხოვრებელი კომპლექსის მშენებლობისთვის შეტანილი თანხა 15 984 828.9 ლარის ოდენობით", - წერია უწყების განცხადებაში.
პროკურატურის განცხადებით, ერთობლიობაში მაია რჩეულიშვილმა ირაკლი მინდელთან და სალომე ჩარკვიანთან ერთად გაფლანგა მენაშენეთა კუთვნილი ფულადი თანხა 19 740 845 ლარი.
"გარდა ამისა, ირაკლი მინდელი შპს "ცენტრ პოინტ ჯგუფის" სამეთვალყურეო საბჭოს თავმჯდომარე გურამ რჩეულიშვილთან ერთად 2009 წლის 7 ივლისიდან - 2010 წლის 30 მარტამდე პერიოდში დაეუფლა მენაშენეთა კუთვნილ დიდი ოდენობით თანხას 1 657 959,39 ლარის ოდენობით, რაც მათ ერთობლივად მიითვისეს. ზემოაღნიშნულიდან გამომდინარე, შპს "ცენტრ პოინტ აჭარამ" არ უზრუნველყო ობიექტების მშენებლობა პუშკინის და ბაგრატიონის ქუჩაზე, არ შეასრულა ნაკისრი ვალდებულებები საცხოვრებელი კომპლექსის "თეთრი მაგნოლიის" მენაშენეების მიმართ, რის გამოც მოქალაქეებმა განიცადეს დიდი ოდენობით მატერიალური ზიანი", - წერია განცხადებაში.
ამ დროისთვის, პროკურატურაში მაია რჩეულიშვილის დაკითხვა მიმდინარეობს. გურამ რჩეულიშვილი უწყებაში არც დღეს გამოცხადდა. შენობასთან აქციას მართავენ მენაშენეები. მათ რჩეულიშვილებს "თაღლითები" უწოდეს.
ვახტანგ და მაია რჩეულიშვილები "ცენტრ პოინტის" მიმართ დაწყებულ გამოძიებას პოლიტიკურ დევნას უკავშირებენ. ამ საკითხზე დღეს კომენტარი გააკეთა იუსტიციის მინისტრმა თეა წულუკიანმა და პოლიტიკური მოტივი გამორიცხა.
არასამთავრობო ორგანიზაცია "საერთაშორისო გამჭვირვალობა - საქართველომ" "ცენტრ პოინტთან" დაკავშირებით 2012 წელს ვრცელი ანგარიში გამოაქვეყნა და მნიშვნელოვნად მიიჩნია, ახალი მთავრობა დაინტერესებულიყო "ცენტრ პოინტი ჯგუფის" საქმით და დაეწყო დეტალების სიღრმისეული გამოძიება.
