რეგიონებში სასწრაფო სამედიცინო დახმარების ეკიპაჟის წევრების ხელფასი იზრდება. ამის შესახებ პრემიერმინისტრმა მამუკა ბახტაძემ მთავრობის სხდომის დაწყებამდე გამართულ ბრიფინგზე განაცხადა. ცვლილების მიხედვით, სასწრაფო სამედიცინო დახმარების ეკიპაჟის ექიმი, ექთანი და მძღოლი 30%-ით მაღალ ხელფასს მიიღებენ.
"ამ ადამიანებს აქვთ უზარმაზარი პასუხისმგებლობა, მართლაც 24-საათიან რეჟიმში მუშაობენ. ვფიქრობთ, ეს ნაბიჯი არის ძალიან მნიშვნელოვანი იმისთვის, რომ ჯანდაცვის სერვისი ჩვენს რაიონებში, ჩვენს მოსახლეობას მივაწოდოთ მაღალი ხარისხით და ოპერატიულად“, - თქვა მამუკა ბახტაძემ.
საქართველოს მთავრობის ადმინისტრაციის ინფორმაციით, ამ დროისთვის, რეგიონული სასწრაფო სამედიცინო დახმარების სერტიფიცირებული ექიმის ანაზღაურება ერთ მორიგეობაზე 100 ლარია, ექთნის - 66 ლარი, ხოლო მძღოლის - 58 ლარი.