ჩინეთის სახალხო რესპუბლიკის ეკონომიკის შესახებ არსებული ოფიციალური ინფორმაცია ნაკლები სანდოობით გამოირჩევა, რადგანაც არსებობს საფუძვლიანი ეჭვი, რომ ქვეყანაში სტატისტიკის გაყალბება ხდება.
ჩინეთის ცენტრალურმა საინფორმაციო სააგენტო Xinhua-მ გაავრცელა ინფორმაცია, რომ ჩინეთის ჩრდილო-დასავლეთ პროვინციების ხელმძღვანელი პირები გასული წლების მანძილზე ხელოვნურად ზრდიდნენ მოსავლის, წარმოებული პროდუქციისა და მომსახურების მოცულობას. ამ გზით რეგიონული მთლიანი შიდა პროდუქტის გაყალბება ხდებოდა.
38-მილიონიანი მოსახლეობის მქონე ხეილუნძიანის პროვინციის მთავრობის წევრის გუან ინმინის თქმით, მისი ოფისი წლების მანძილზე ინვესტიციების შესახებ ინფორმაციას მინიმუმ 20%-ით აყალბებდა. გასული ხუთი წლის მანძილზე ხეილუნძიანის პროვინციაში გაფორმდა არარსებული $15 მილიარდის ინვესტიცია. რეგიონის ეკონომიკური ზრდის გაყალბებული მაჩვენებელი გასულ წელს 9.5% იყო, ხელახლა გადათვლილი კი დაახლოებით 2.7%-ს შეადგენს.
ანალიტიკოსების შეფასებით, სტატისტიკას არა მხოლოდ პროვინციები, არამედ პეკინის ცენტრალური მთავრობაც აყალბებს. Goldman Sachs-ის ანალიტიკოსის, ენდრიუ ტილტონის თქმით, ბანკის მიერ ჩატარებული ალტერნატიული გამოთვლების შედეგად დადგინდა, რომ წელს ჩინეთის ეკონომიკური ზრდა 6%-ზე მაღალი არ ყოფილა, თუმცა ოფიციალური სტატისტიკის მიხედვით ზრდა 6.9%-ია.