კალიფორნიის სანაპიროსთან საკრუიზო გემზე მყოფ 21 ადამიანს კორონავირუსი დაუდასტურდა. ამის შესახებ აშშ-ის ვიცეპრეზიდენტმა, მაიკ პენსმა ბრიფინგზე თქვა და აღნიშნა, რომ მათ შორის ეკიპაჟის 19 წევრია, ორი კი მგზავრი. ტესტირება გემზე მყოფ 46 ადამიანს ჩაუტარდა.
პენსსის თქმით, ის კალიფორნიის გუბერნატორთან აქტიურად თანამშრომლობს და გემს მალე არაკომერციულ პორტში გადაიყვანენ. Grand Princess-ის ბორტზე 3500- ზე მეტი ადამიანი იმყოფება, მათ შორის 2422 მგზავრია, 1111 კი ეკიპაჟის წევრი.
აშშ-ში, ბოლო 24 საათის განმავლობაში კორონავირუსის 100 ახალი შემთხვევა დადასტურდა. საერთო რაოდენობა კი 329-მდე გაიზარდა. კორონავირუსით გარდაცვლილთა რიცხვი 17-მდე გაიზარდა.
