თბილისის მერია კომპანია "თბილისის მიკროავტობუსსა" და სამარშრუტო ტაქსების მძღოლებს მოლაპარაკებებისკენ მოუწოდებს. ამის შესახებ მერიამ განცხადება გაავრცელა.
"თბილისის მერიის მთავარ ამოცანას თბილისელების უსაფრთხო, კომფორტული გადაადგილება და მგზავრობის ხელმისაწვდომი ტარიფის არსებობა წარმოადგენს. შესაბამისად მიგვაჩნია, რომ სამარშრუტო ტაქსების მოწესრიგება, ავტოპარკის სრული განახლება და მგზავრობის უსაფრთხოების ამაღლება, პირველ რიგში, სწორედ თბილისელების ინტერესების გათვალისწინებით ხორციელდება. ამასთანავე, გვინდა აღვნიშნოთ, რომ კომპანია "თბილისის მიკროავტობუსსა" და სამარშრუტო ტაქსების მძღოლებს შორის არსებული ურთიერთობა, კერძო სამართლებრივ საკითხს წარმოადგენს. მოვუწოდებთ ორივე მხარეს, დაიწყონ მოლაპარაკებები და დროულად გადაჭრან კომპანიის შიდა პრობლემები, რათა თბილისელები არ დაზარალდნენ'', - ნათქვამია მერიის განცხადებაში.
განცხადებაში ასევე აღნიშნულია, რომ მერიის მიერ 2011 წელს ჩატარებული კონკურსი კანონის სრული დაცვით ჩატარდა და მისი რევიზიის უფლება მხოლოდ სასამართლოს აქვს ''და თუ რომელიმე მხარე, მათ შორის, ე.წ. ხაზების ძველი მეპატრონეები კონკურსის შედეგებს სადავოდ მიიჩნევს, შეუძლია მიმართოს სასამართლოს და საკუთარი პრეტენზა დააფიქსიროს''.
შეგახსენებთ, დღეს, 25 იანვარს, დილის 08.00 საათიდან, თბილისში ყვითელი მიკროავტობუსების მძღოლები გაიფიცნენ. ისინი რამდენიმე მოთხოვნის დაკმაყოფილებას ითხოვენ: კერძოდ, დღიური გეგმის, სამუშაო საათების შემცირებასა და ანაზღაურების მომატებას, ბუღალტრის გადასახადის გაუქმებას და ინდმეწარმის გადასახადისგან გათავისუფლებას.