საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის მხრიდან საქართველოს სუვერენიტეტისა და ტერიტორიული მთლიანობისა და ცეცხლის შეწყვეტის შესახებ 2008 წლის 12 აგვისტოს შეთანხმების დარღვევის მორიგი ფაქტის გამო. საგარეო უწყება მოუწოდებს საერთაშორისო თანამეგობრობას, საქართველოში აკრედიტებულ დიპლომატიურ კორპუსსა და საქართველოში ევროკავშირის მონიტორინგის მისიას, სათანადო რეაგირება მოახდინონ მომხდარ ინციდენტზე, საქართველოს წინააღმდეგ პროვოკაციული ქმედებების და ვითარების დაძაბვის მცდელობების აღკვეთის მიზნით.
სამინისტროს ინფორმაციით, დღეს, 10:40 საათზე რუსული AN-2 ტიპის თვითმფრინავი ოკუპირებული აფხაზეთის რეგიონის მიმართულებიდან საქართველოს ცენტრალური ხელისუფლების მიერ კონტროლირებად საჰაერო სივრცეში შემოიჭრა და ზუგდიდის რაიონის სოფ. შამგონასა და ხურჩაში განლაგებულ შსს-ს საგუშაგოებს გადაუფრინა. თვითმფრინავმა 12:45 საათზე კვლავ დაარღვია ცენტრალური ხელისუფლების მიერ კონტროლირებადი საჰაერო სივრცე და ზუგდიდისა და წალენჯიხის რაიონის სოფლებს, შამგონას, ხურჩას, რუხსა და ფახულანს გადაუფრინა.
